ބޮލީވުޑްގެ މަޝްހޫރު ތަރިއެއް ކަމަށްވާ ޝާހްރުކް ޚާންއަށް މަރުގެ އިންޒާރެއް ލިބިފައިވާ ކަމަށް އިންޑިއާގެ ނޫސްތަކުން ބުނެފި އެވެ.

މިދިޔަ އަންގާރަ ދުވަހު ޝާހްރުކް ޚާންއަށް ފޯނުން ދިން އެ އިންޒާރުގައި ބުނެފައިވަނީ 50 ލައްކަ ރުޕީސްގެ އަދަދެއް ނުދީފިނަމަ އޭނާގެ ފުރާނައަށް ނުރައްކާ ކުރާނެ ކަމަށެވެ.

މި އިންޒާރާއެކު މުމްބާއީގެ ފުލުހުންނަށް މައްސަލަ ހުށައެޅުމުން ފެށި ތަހުގީގުން އެ ފޯނު ކުރީ ޖެއިޕޫރުން ކަން އެނގުނެވެ. އިތުރަށް ބެލި ބެލުންތަކުން ހާމަވި ގޮތުގައި ފޯނުކުރީ ފައިޒާން ޚާން ނަމަކަށް ކިޔާ ވަކީލެކެވެ.

ފުލުހުން ފައިޒާންއާ ބައްދަލު ކުރުމުން އެ ފޯނުކުރީ އޭނާ ނޫން ކަމަށާއި ވަރަށް ފަހުން އޭނާގެ ފޯނު ވަގަށް ނަގާފައިވާ ކަމަށް ފައިޒާން މައުލޫމާތު ދިނެވެ.

ފައިޒާންއާ ކުރި ސުވާލުތަކުން އިތުރަށް އެނގުނު ގޮތުގައި އޭނާއަކީ ރާޖަސްތާނަށް ނިސްބަތްވާ މީހެކެވެ. އަދި ބިޝްނޯއީ ގޭންގަކީ އޭނާގެ ގާތް ރަހުމަތްތެރިންނެވެ.

ފާހަގަކުރެވޭ ކަމަކީ މީގެ އެތައް އަހަރެއް ކުރިން ފިލްމު "އަންޖާމް"ގައި ޝާހްރުކް ޚާން ބުނި ޑައިލޮގެއްގެ ސަބަބުން އޭނާއާ ދެކޮޅަށް ފައިޒަން ކޯޓަށް މައްސަލައެއް ހުށައަޅާފައިވާ ކަމެވެ.

ފުއްލާއެއް މެރުމާ ބެހޭގޮތުން ޝާހްރުކް ޚާން ބުނެފައިވާ އެ ޑައިލޮގްގެ މައްސަލަ ހުށައެޅީ އިސްލާމް ދީނުގައި ފުއްލާ ހިމާޔަތް ކުރަން އަންގަވާފައި އޮތުމުން ކަމަށް ފައިޒަން ބުންޏެވެ.

ޝާހުރުކް ޚާންއަށް މި އިންޒާރު ލިބިފައި މިވަނީ ބިޝްނޯއީ ގޭންގުގެ ފަރާތުން ސަލްމާން ޚާންއަށް މަރުގެ އިންޒާރު ދިނުމުން އޭނާގެ ސެކިއުރިޓީ ވަރުގަދަ ކުރެވިފައިވާ ދަނޑިވަޅެއްގަ އެވެ.