މާލޭގައި ސިލްސިލާކޮށް ހިންގަމުން ދިޔަ މާރާމަރީތަކަކާ ގުޅިގެން ހަތަރު މީހަކު ހައްޔަރުކޮށްފި އެވެ.

ޖަމާއަތް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގިކަމުގެ ތުހުމަތުގައި ހައްޔަރުކޮށްފައި ވަނީ، އުމުރުން 21 އަހަރާއި 23 އަހަރުގެ ހަތަރު ދިވެހި ފިރިހެނުންނެވެ.

އެ މީހުންގެ ބަންދާމެދު ގޮތެއް ނިންމަން އެންމެ ފުރަތަމަ ހާޒިރުކުރީ އދ. މަހިބަދޫ މެޖިސްޓްރޭޓް ކޯޓަށެވެ. އެ ކޯޓުން ޖެހި ބަންދުގެ މުއްދަތު ހަމަވުމުން ދެން ގެނައީ ކްރިމިނަލް ކޯޓަށެވެ.

ކޯޓު އަމުރުގައިވާގޮތުން އެ މީހުން ހައްޔަރުކޮށްފައި ވަނީ "ސިލްސިލާކޮށް ހިނގަމުންދާ މާރާމާރީގެ ކުށްތަކެއްގައި" އެވެ. އެ މާރަމާރީގައި މީހަކަށް ޖިސްމާނީ އަނިޔާ ދީފައިވާ ކަމަށް ފުލުހުން ކޯޓުގައި ބުނެފައިވެ އެވެ.

އެ އެންމެންނަކީ ވެސް މީގެ ކުރިން އެކި މައްސަލަތަކުގައި ހައްޔަރުކޮށްފައިވާ މީހުންނެވެ.

އެ އެންމެން ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ވަނީ އަމުރުކޮށްފަ އެވެ.

މިކަމާ ގުޅިގެން ފުލުހުން ރަސްމީކޮށް ވަކިއެއްޗެއް ނުބުނެ އެވެ.