އިޒްރޭލުން ފަލަސްތީނުގައި ހިންގަމުންދާ ގަތުލުއާއްމުގައި މިހާތަނަށް ޝަހީދުވެފައިވާ މީހުންގެ 70 އިންސައްތައަކީ ކުޑަ ކުދިންނާއި އަންހެނުންކަމަށް އދ ގެ އިންސާނީ ހައްގުތަކާއި ބެހޭ އޮފީހުން ބުނެފި އެވެ.

ޣައްޒާގައި ކުރަމުންދާ ހަނގުރާމައިގައި އާއްމުންގެ ގިނަ އަދަދެއްގެ ބަޔަކު މަރުވަމުން ދިއުމާއި ގުޅިގެން އދ ގެ ހިއުމަން ރައިޓްސް އޮފީހުން ވަނީ އެކަން ކުށްވެރިކޮށްފަ އެވެ. އެގޮތުން އެ އޮފީހުގެ ހިސާބުތައް ދައްކާގޮތުން ފާއިތުވި ހަ މަސް ދުވަސް ތެރޭގައި ޝަހީދުކޮށްލާފައިވާ މީހުންގެ 70 އިންސައްތައަކީ ކުޑަ ކުދިންނާއި އަންހެނުންކަމަށް އެ އޮފީހުން ބުނެ އެވެ.

އދ އިން ބުނީ މިހާ ގިނަ އަދަދެއްގެ އާއްމުން މަރުވާ ސަބަބަކީ މީހުން ދިރިއުޅޭ ސަރަހައްދުތަކަށް އިޒްރޭލުން ހަމަލާ ދިނުންކަމަށާއި އަދި ފަލަސްތީނުގައި ހަރަކާތްތެރިވާ ހަމާސް ގްރޫޕްގެ އަމަލުތަކުގެ ސަބަބުންވެސް އާއްމުންގެ ފުރާނަ ގެއްލިފައިވާކަމަށެވެ.

ހިއުމަން ރައިޓްސް އޮފީހުން ނެރުނު މި ރިޕޯޓްގައި ބުނެފައިވަނީ ނޮވެމްބަރު 2023 އިން ފެށިގެން އޭޕްރީލް 2024 އާއި ހަމައަށް އެއް ކުރެވުނު މައުލޫމާތައް ބަލާއިރު، ޣައްޒާގައި މަރުވި މީހުންގެ ތެރެއިން 44 އިންސައްތަ އަކީ ކުޑަކުދިންކަމަށާއި އަދި 26 އިންސައްތަ އަކީ އަންހެނުން ކަމަށެވެ. މަރުވި ކުޑަ ކުދިންގެ އެވްރެޖް އުމުރަކީ 5 އަހަރާއި 9 އަހަރާ ދެމެދު ކަމަށް ރިޕޯޓްގައި ބުނެފައިވެ އެވެ. މީގެ ތެރެއިން ގިނަ މީހުން މަރުވެފައިވަނީ އެމީހުން ދިރިއުޅޭ އިމާރާތްތަކުގައި ކަމަށްވެސް ރިޕޯޓްގައި ބުނެ އެވެ.

ޣައްޒާގެ ހެލްތު މިނިސްޓްރީން އާއްމުކޮށްފައިވާ މައުލޫމާތުތަކަށް ބަލާއިރު ޣައްޒާގައި ޝަހީދުވި މީހުންގެ އަދަދު 43،300 އަށް ވަނީ އަރާފަ އެވެ. މީގެ އިތުރުންވެސް އިމާރާތްތަކުގެ ދަށުގައި ތާށިވެފައިވާ ހަށިގަނޑުތައް ވެސް ހުންނާނެކަމަށް ބެލެވެ އެވެ.

މިކަމާއި ގުޅިގެން އދ ގެ ހިއުމަން ރައިޓްސް އޮފީހުގެ ޗީފް ވޮލްކާ ޓާކް ބުނެފައިވަނީ މި އަދަދަށް ކުށެއްނެތް އާންމުން މަރުވުމަކީ ބައިނަލްއަގުވާމީ އުސޫލުތަކާއި ގާނޫނުތަށް ނެގެހެއްޓުމުގައި ގައުމުތަކުން ފެއިލް ވެފައިވާކަން ހާމަވާ ކަމެއް ކަމަށެވެ.