އަންނަ އަހަރު ބާއްވަން ހަމަޖެހިފައިވާ ޕާމް ސްޕްރިންގްސް އިންޓަނޭޝަނަލް ފިލްމް ފެސްޓިވަލްގައި އެކްޓަރު ނިކޯލް ކިޑްމަންއަށް ހާއްސަ ޝަރަފެއް ދޭން ނިންމައިފި އެވެ.

ހަބަރުތައް ބުނާ ގޮތުގައި ނިކޯލްއަށް "އިންޓަނޭޝަނަލް ސްޓާ" އެވޯޑު ދޭން ހަމަޖެހިފައިވަނީ މިއަހަރުގެ އޮގަސްޓް މަހު ރިލީޒް ކުރެވުުނު ފިލްމު "ބޭބީ ގާލް"ގައި އޭނާ ދައްކުވައިދިން ރޯލަށެވެ.

މިކަން އިއުލާން ކުރަމުން އެ ފިލްމް ފެސްޓިވަލްގެ ޗެއާމަން ނަޗައްތަރު ސިންހް ބުނީ "ބޭބީ ގާލް"ގައި ނިކޯލް ދައްކުވައިދިން ރޯލުން އޭނާއަކީ ތަފާތު ވަރުގަދަ ރޯލުތަކަށް އެކަށޭނަ ތަރިއެއްކަން ސާބިތު ކޮށްދީފައިވާ ކަމަށެވެ.

ތުރިލާ ފިލްމެއް ކަމަށްވާ ބޭބީ ގާލްގައި ނިކޯލް ކުޅެފައިވަނީ ނުރައްކާތެރި ކަންތައްގަނޑެއްގެ ތެރޭގައި އުޅެން ޖެހިފައިވާ ވިޔަފާރިވެރިއެއްގެ ރޯލެވެ.

އެ ފިލްމުގައި ނިކޯލް ދައްކުވައިދިން އެކްޓިންއަށް މިދިޔަ ސެޕްޓެމްބަރު މަހު ބޭއްވި ވެނިސް ފިލްމު ފެސްޓިވަލްގެ "ބެސްޓް އެކްޓްރެސް"ގެ އެވޯޑު ވެސް ލިބިފައިވެ އެވެ.

އަންނަ ޖެނުއަރީ މަހުގެ 2 ން 13 އަށް ބާއްވަން ހަމަޖެހިފައިވާ ޕާމް ސްޕްރިންގްސް އިންޓަނޭޝަނަލް ފިލްމް ފެސްޓިވަލްއަކީ އެމެރިކާގެ ސްޓޭޓެއް ކަމަށްވާ ކެލިފޯނިއާގައި ބާއްވާ އެވޯޑް ހަފްލާ އެކެވެ.