ސަރުކާރުން މީޑިއާ ކޮންޓްރޯލްކުރާގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލް ޕީއެންސީން ބޭރުކޮށްލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް މުއިއްޒު މިފަދައިން ވިދާޅުވީ ސަރުކާރަށް އެއް އަހަރު ފުރުމަށް މިރޭ ބޭއްވި ޖަލްސާއަށްފަހު ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

ނޫސްވެރިޔާ ކުރި ސުވާލަކީ އެ ބިލަކީ ރައީސް މުއިއްޒުގެ ސިޔާސަތުތަކާ އިދިކޮޅު ބިލެއް ކަމުގައި އެމަނިކުފާނު ވިދާޅުވެފައިވާއިރު، އެ ބިލް މަޖިލީހުން ބޭރުކޮށްލާނަންތޯއެވެ. ޖަވާބުގައި އެމަނިކުފާނު ވިދާޅުވީ އެ ބިލް ބޭރުކޮށްލާނެ ކަމަށެވެ.

އެ ބިލް ބޭރުކުރާނެ ކަމަށް ރައީސް މުއިއްޒު ވިދާޅުވީ އެ ބިލާ ގުޅޭގޮތުން މީޑިއާ ކައުންސިލާއި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ހިމެނޭހެން ގިނަ އަދަދެއްގެ ނޫސްވެރިން ކަންބޮޑުވުންފާޅުކޮށް، އަޑުއުފުލަމުންދާ ދަނޑިވަޅެއްގަ އެވެ.

ނޫސްވެރިންގެ ވޯކިން ގްރޫޕުން މިއަދު އިންފޮމޭޝަން މިނިސްޓަރު އިބްރާހީމް ވަހީދާއި އެޓާނީ ޖެނެރަލް އަހްމަދު އުޝާމްގެ އިތުރުން ރައީސް އޮފީހުގެ ކޮމިޔުނިކޭޝަން މިނިސްޓަރު އިބްރާހީމް ޚަލީލާ ބައްދަލުކޮށް ކަންބޮޑުވުންތައް ހިއްސާކުރުމުން ވެސް އެ ބިލް ބޭރުކުރާނެ ކަމަށް ވިދާޅުވެފައެއްނުވެ އެވެ.