ބޮލީވުޑްގެ މަޝްހޫރު ފިލްމެއް ކަމަށްވާ "ކަރަން އަރުޖުން"ގެ ރީބޫޓެއް ހަދާނަމަ އެ ފިލްމުގެ ލީޑު ރޯލުތަކަށް ބޭނުންވަނީ ރިތިކް ރޯޝަންއާއި ރަންބީރު ކަޕޫރު ކަމަށް ޑައިރެކްޓަރު ރާކޭޝް ރޯޝަން ބުނެފި އެވެ.

ދާދި ފަހުން އީ ޓައިމްސްއަށް ދިން އިންޓަވިއުއެއްގައި ވާހަކަ ދައްކަމުން ރާކޭޝް ބުނީ "ކަރަން އަރުޖުން"ގެ ރީބޫޓެއް ނުވަތަ ރީމޭކެއް ވިޔަސް ހަދަން ނުވިސްނާ ކަމަށެވެ.

އެހެން ނަމަވެސް އެފަދަ ފިލްމެއް މިއަދުގެ ޖީލުގައި ހަދާނަމަ އެ ފިލްމުގެ މައި ކެރެކްޓަރުންނަށް އެންމެ އެކަށީގެންވަނީ ރިތިކްއާއި ރަންބީރު ކަމަށް ރާކޭޝް ބުންޏެވެ.

ރާކޭޝް މި ބީދައިން ވާހަކަ ދައްކާފައި މިވަނީ "ކަރަން އަރުޖުން" ރިލީޒް ކުރިތާ ގާތްގަނޑަކަށް 30 އަހަރު ފަހުން އެ ފިލްމު އަލުން ސިނަމާތަކުގައި އަޅުވަން ނިންމާފައި ވަނިކޮށެވެ.

1995 ވަނަ އަހަރު ރިލީޒް ކުރެވުނު އެ ފިލްމުގެ ލީޑު ރޯލުން ފެނިގެން ދިޔައީ ޝާހްރުކް ޚާންއާއި ސަލްމާން ޚާންގެ އިތުރުން ކާޖޮލްއާއި މަމްތާ ކުލްކަރްނީ އެވެ.

އެ ދުވަސްވަރު ބޮލީވުޑްގެ އެންމެ ފުންނާބު އުސް ދެ ތަރިން އެކުގައި އެންމެ ފުރަތަމަ ފަހަރަށް ފެނުނު އެ ފިލްމަށް އޭރު ބޮޑު ކާމިޔާބެއް ލިބިފައިވެ އެވެ.