މީގެ ވިއްސަކަށް އަހަރު ކުރިން 2001 ވަނަ އަހަރު އާއްމުވި ހޮލީވުޑްގެ ތަރި ނިކޯލް ކިޑްމަންގެ ފޮޓޯއަކަށް އޭރު ބޮޑު ސަމާލުކަމެއް ލިބުނެވެ.

ފެހި ހަރުވާޅަކާއި ފިޔާތޮށި ހެދުމެއް ލައިގެން ނިކޯލް ހުރި އެ ފޮޓޯގައި ވައިގެ ތެރޭގައި އޭނާ އަތް ހޫރާލާ މަންޒަރު ފެންނައިރު ފެންނަ ފެނުމަށް އޭނާ ކޮންމެވެސް ކަމަކާ އުފާ ފާޅުކުރަނީ އެވެ.

އެ ފޮޓޯ އާއްމުވުމުގެ ކުޑަ ދުވަސްކޮޅެއް ކުރިން ނިކޯލްއާއި އޭނާގެ ފުރަތަމަ ފިރިމީހާ ޓޮމް ކުރޫޒްގެ ކައިވެނި ވަނީ ރޫޅިފަ އެވެ. އެހެން ކަމުން ގިނަ ބަޔަކު ހީކުރީ އޭނާ އުފާ ފާޅުކުރީ އެހެންވެ ކަމަށެވެ.

އެއާއެކު އެ ފޮޓޯ ވަގުތުން ވައިރަލްވި އެވެ. އިންޓަނެޓުގައި ހަލުވިކަމާއެކު އެ ހަބަރު ފެތުރެން ފެށި އެވެ. އެންމެން ވެސް ބުނީ ނިކޯލް ހުރީ ކައިވެނި ރޫޅުން ލަސްވެގެން ކަމަށެވެ.

އެހެން ނަމަވެސް އޭގެ 23 އަހަރު ފަހުން މިހާރު އުމުރުން 57 އަހަރުގެ ނިކޯލް މިވަނީ ދާދި ފަހުން ދިން އިންޓަވިއުއެއްގައި އެ ފޮޓޯގެ ހަގީގަތް ކިޔައިދީފަ އެވެ.

އެ އިންޓަވިއުގައި އެ ފޮޓޯގައި އޭނާ އުފާ ފާޅުކުރަނީ ކައިވެނި ރޫޅުމުންތޯ ސުވާލު ކުރެވުމުން ނިކޯލް ބުނީ އެއީ އެއްވެސް ހަގީގަތެއް ނެތް ވާހަކަތަކެއް ކަމަށާއި އެ ފޮޓޯއަކީ ފިލްމެއްގެ ސްޓިލް ޝޮޓެއް ކަމަށެވެ.

1990 ވަނަ އަހަރު ކައިވެނިކުރި ނިކޯލްއާއި ޓޮމްގެ ކައިވެނި 11 އަހަރު ފަހުން ރޫޅުނުއިރު އެމީހުން ވަނީ ދެ ދަރިންގެ ބަލަދުވެރިކަމާ ހަވާލުވެފަ އެވެ.