ސައުވީސް ގަޑިއިރު ތެރޭގައި ދައުލަތެއްގެ ގާނޫނުއަސާސީ ބަދަލުކޮށްލާއިރު ރައްޔިތުން ގާތު ހޭވެސް އަހާނުލާކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.

މީކާއިލް މިހެން ވިދާޅުވީ ސަރުކާރުގެ ފަރާތުން ގާނޫނު އަސާސީއަށް އިސްލާހު ގެނައުމަށް މިއަދު ރައްޔިތުންގެ މަޖިލީހަށް ހުށަހަޅާފައިވާ އިސްލާހުތައް އަވަސް އަރުވާލާފައި މިއަދު މިއަދަށް ނިންމުމަށް މަސައްކަތް ކުރަމުންދާ ވަގުތެއްގަ އެވެ.

ސަރުކާރުން މިއަދު ހުށަހަޅާފައިވަނީ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުމަށާއި ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުމުގެ އިތުރުން ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ބަދަލުކުރުމަށެވެ.

ސަރުކާރުގެ ފަރާތުން މި އިސްލާހުތައް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.

"ގާނޫނުއަސާސީ އިސްލާހުކުރަން ބިލު ހުށަހެޅީ މިއަދު. ފުރަތަމަ ކިޔުން އިއްވުން މިއަދު. ބަހުސް މިއަދު. ކޮމިޓީ މަސައްކަތް މިއަދު. ކޮމިޓީ ރިޕޯޓު އިއްވާ ބިލަށް ވޯޓަށް އެހުންވެސް މިއަދު. 24 ގަޑިއިރު ތެރޭ ދައުލަތެއްގެ ގާނޫނު އަސާސީ ބަދަލުކޮށްލާއިރު ރައްޔިތުން ގާތު ހޭވެސް އަހާނުލާ!" މީކާއިލް މިއަދު ކުރެއްވި އެކްސް ޕޯސްޓެއްގައި ވިދާޅުވެފައިވެ އެވެ.

ސަރުކާރުން ގާނޫނުއަސާސީ އިސްލާހުކުރަން މިއަދު ހުށަހަޅާފައިވާ ބިލުގެ މަސައްކަތް ވީހާ ވެސް އަވަހަށް ނިންމަން ރައްޔިތުންގެ މަޖިލީހުގެ، މުޅި މަޖިލީހުގެ ކޮމިޓީއަށް ފޮނުވުމަށްފަހު އެ އިސްލާހު މިއަދުން މިއަދަށް ފާސްކުރުމަށް މިއަދު ހަވީރަށް ވަނީ މަޖިލިސް ޖަލްސާއެއް އެޖެންޑާކޮށްފަ އެވެ.