ބޮޑުވަމުން އައިއިރު މޫނުގައި އިސްތަށި ހުރުމުން ގިނަ ބައެއްގެ ފުރައްސާރަ އަމާޒުވި ކަމަށް ބޮލީވުޑްގެ މަޝްހޫރު ތަރި ސޯނަމް ކަޕޫރު ބުނެފި އެވެ.

ބަރްކާ ދަޓްގެ "ވީ ދަ ވުމަން ސަމިޓް"ގައި ވާހަކަ ދައްކަމުން ސޯނަމް ބުނީ އޭނާއަކީ މިހާރު "ފެޝަން އައިކަން"އެއްގެ ގޮތުގައި ބެލެވުނު ފަރާތެއް ނަމަވެސް ފެށުނީއްސުރެ އޭނާއަކީ އަމިއްލަ ނަފްސަށް އިތުބާރުކުރި މީހެއް ނޫން ކަމަށެވެ.

ޒުވާން ދުވަސްވަރު ޕޮލިސިސްޓިކް އޯވަރީ ސިންޑްރޯމް ތަހައްމަލް ކުރި ކަމަށާއި އެކަމުގެ ސަބަބުން ގިނަ ގޮންޖެހުންތަކަކާ ކުރިމަތިލާން ޖެހުނު ކަމަށް ސޯނަމް ބުންޏެވެ.

އެގޮތުން ޕީސީއޯއެސްގެ ސަބަބުން އޭނާގެ މޫނުގައި އާދަޔާ ޚިލާފަށް އިސްތަށި ފެޅުން ގިނަވި ކަމަށާއި އެކަން ފާހަގަކޮށް ގިނަ ބަޔަކު އޭނާއަށް ފުރައްސާރަކުރި ކަމަށް ސޯނަމް ބުންޏެވެ.

"ޕީސީއޯއެސްގެ ސަބަބުން ފުރާވަރުގައި އަހަރެންގެ ބަރުދަން ވަރަށް ބޮޑަށް އިތުރުވި. މޫނުމަތިން އިސްތަށްޓާއި ބިހި ނަގަން ފެށި." ސޯނަމް ބުނެފައިވެ އެވެ.

ސޯނަމް އިތުރަށް ބުނީ އެ ހުރިހާ ކަމެއް އުމުރާއެކު ފަނޑުވެގެން ދިޔަ ކަމަށާއި އެހެން ނަމަވެސް އެ ތަޖުރިބާއިން އޭނާއަށް ހިތި އަސަރުތަކެއް ކުރުވި ކަމަށެވެ.

2018 ވަނަ އަހަރު ވިޔަފާރިވެރިޔާ އާނަންދު އަހޫޖާއާ ކައިވެނި ކުރުމަށްފަހު ބޮލީވުޑްއާ ދުރަށް ޖެެހިލި ސޯނަމް ވަނީ 2022 ވަނަ އަހަރު އޭނާގެ އަލަތު ދަރިފުޅަށް މަރުހަބާ ކިޔާފަ އެވެ.