އެންޓި ކޮރަޕްޝަން ކޮމިޝަން އާއި އިލެކްޝަންސް ކޮމިޝަނުގެ ނައިބު ރައީސުންނާއި މެންބަރުންތަކެއް ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއިން މިއަދު ބޭއްވި ސިއްރު ބައްދަލުވުމެއްގައި ފާސްކޮށްފި އެވެ.

ސިއްރުކޮށްގެން ކުރިއަށްގެންދިޔަ މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމުގައި މަގާމުން ވަކިކުރަން ފާސްކުރީ އޭސީސީގެ ނައިބު ރައީސް އަބްދުއްސަލާމް އާއި މެންބަރު ތޯހާ މުހައްމަދު އަދި އިލެކްޝަންސްގެ ނައިބު ރައީސް އަލީ ނަޝާތާއި އެ ކޮމިޝަނުގެ މެންބަރުން ޑރ. މުހައްމަދު ޒާހިރު އަދި މުހައްމަދު އާސިފް އެވެ.

މީގެ އިތުރުން ސިވިލް ސާވިސް ކޮމިޝަންގެ ރައީސް މުހައްމަދު ނާސިހު ވަކިކުރުމަށްވެސް އެ ކޮމިޓީއަށް ހުށަހަޅާފައިވެ އެވެ. އެ މައްސަލައިގައި ކޮމިޓީން ނިންމީ ނާސިހު ވަކި ނުކުރުމަށެވެ.

އީސީގެ ނައިބު ރައީސާއި ދެ މެންބަރަކު ސުލޫކީ މިންގަނޑާ ހިލާފުވި މައްސަލައެއް ކޮމިޓީއަށް ހުށަހަޅާފައިވަނި 22 އޮކްޓޯބަރުގަ އެވެ. އޭސީސީގެ ނައިބު ރައީސާއި މެންބަރު ތޯހާ ވަކިކުރަން ހުށަހެޅީ އެންޓި ކޮރަޕްޝަން ކޮމިޝަނުގެ ގާނޫނުގެ 17 ވަނަ މާއްދާގެ ހ. އަދި ށ. އާ ހިލާފަށް އަމަލުކޮށްފައިވާ ކަމަށް ތުހުމަތުކޮށް މިނިވަން މުއައްސަސާތަކުގެ ކޮމިޓީއަށް ލިބިފައިވާ ދެ މައްސަލައަކާ ގުޅިގެންނެވެ.

މައްސަލައާއި ގުޅޭ ހުރިހާ ތަފްސީލެއް ކޮމިޓީން ވަނީ ސިއްރު ކޮށްފަ އެވެ.

މުހިއްމު ދެ މިނިވަން މުއައްސަސާއެއްގެ މެންބަރުން ވަކި ކުރުމުގެ މަސައްކަތް ސަރުކާރުން ފަށާފައިވާއިރު، އީސީ އާއި އޭސީސީގެ ރައީސް އާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ލިބޭގޮތަށްވެސް ސަރުކާރުން ވަނީ ބިލެއް ހުށަހަޅާފަ އެވެ.

މީ ރައީސް މުހައްމަދު މުއިއްޒު މިނިވަން މުއައްސަސާތަކަށް ނުފޫޒު ފޯރުވުމަށް ގެންނަވާ ބަދަލުތަކެއް ކަމަށް ބައެއް ފަރާތްތަކުން ދަނީ ބުނަމުންނެވެ.