މީގެ ދެ ދުވަހެއް ކުރިން އިންޑިއާގެ މުމްބާއީގައި ބޭއްވި މަޝްހޫރު ލަވަކިޔުންތެރިޔާ ޑުއާ ލިޕާގެ ކޮންސެޓަކީ މިހާތަނަށް އިންޑިއާގައި ބޭއްވި އެންމެ ކާމިޔާބު އެއް ކޮންސެޓެވެ.

އެ ކޮންސެޓުގައި ރާދިކާ މާޗަންތު، އަނަންދު ޕިރަމަލް އަދި ރަންވީރު ޝޯރޭ ފަދަ މަޝްހޫރު ޝަހްސިއްޔަތުން ފެނިފައިވެ އެވެ. އެހެން ނަމަވެސް އެއްވެ ތިބި މީހުންގެ ސަމާލުކަން ހޯދީ މުޅިން އެހެން ކަމެކެވެ.

ކޮންސެޓުގެ ތެރެއިން ޑުއާލިޕާ ވަނީ އޭނާގެ ލަވައެއް ކަމަށްވާ "ލެވިޓޭޓިން"އާއި ބޮލީވުޑްގެ މަޝްހޫރު އެކްޓަރު ޝާހްރުކް ޚާންގެ ލަވައެއް ކަމަށްވާ "ވޮ ލަޑްކީ ޖޯ"ގެ މޭޝްއަޕްއެއް ހުށައަޅައިދީފަ އެވެ.

ސަޕޯޓަރަކު ހަދައިދީފައިވާ އެ މޭޝްއަޕް ޑުއާލިޕާ ހުށައަޅައަން ފެށުމާއެކު މުޅި ސަރަހައްދު އެއް އަޑަކުން ވަނީ ގުގުމާލާފަ އެވެ. އެއާއެކު އޭނާއަށް ކުރަމުންދިޔަ ސަޕޯޓު އިތުރުވި އެވެ.

ޑުއާ ލިޕާ ހިންދީ ފިލްމެއްގެ ލަވައެއް ހުށައެޅުން ވެގެންދިޔައީ ގިނަ ބަޔަކު ހައިރާން ވެސް ކުރުވި ކަމަކަށެވެ. އޭގެ ތެރެއިން އެކަކަކީ ޝާހްރުކް ޚާންގެ ދަރިފުޅު ސުހާނާ ޚާން އެވެ.

ސުހާނާ ވަނީ އޭނާގެ އިންސްޓަގްރާމް ސްޓޯރީގައި އެ ހުށައެޅުމުގެ ވީޑިއޯއެއް ހިއްސާކޮށް ޑުއާލިޕާއާއި ޝާހްރުކް ޚާންގެ މޭޝްއަޕްއަށް ތައުރީފު ކޮށްފަ އެވެ.

ޑުއާލިޕާ 2019 ވަނަ އަހަރު އިންޑިއާއަށް ކުރި ދަތުރުގައި ޝާހްރުކް ޚާންއާ ބައްދަލު ކޮށްފައިވެ އެވެ. މިއީ އޭނާ އިންޑިއާއަށް ކުރާ ތިންވަނަ ދަތުރެވެ.