70ގެ އަހަރުތަކުގައި ބޮޑު މަގުބޫލު ކަމެއް ހޯދި އިނގިރޭސި ލަވަކިޔުންތެރިޔާ އަދި ޕިއާނޯ ކުޅުންތެރިޔާ އެލްޓަން ޖޯންގެ ލޮލުގެ ފެނުން ގެއްލިއްޖެ އެވެ.

"ދަ ޑެވިލް ވެއާސް ޕްރާޑާ"ގެ ގާލާ ހަފްލާގައި ބައިވެރިވި އެލްޓަން އެ ހަފްލާގައި ވާހަކަ ދައްކަމުން ބުނެފައިވަނީ ވަރަށް ގިނަ ޕްރިވިއުސްތަކަށް ނުދެވި ހިނގައްޖެ ކަމަށާއި އެއީ ފެނުމުގެ ހިއްސު ގެއްލުމުގެ ސަބަބުން ކަމަށެވެ.

މަންޒަރު ނުފެނުނެއް ކަމަކު ހުށައެޅުންތަކުގެ އަޑުއަހަން ލޯބިކުރާ ކަމަށާއި އެރޭގެ ޝޯއަކީ ވަރަށް ރަނގަޅު ޝޯއެއް ކަމަށް ވެސް އެލްޓަން ބުންޏެވެ.

މިހާރު އުމުރުން 77 އަހަރުގެ އެލްޓަންއަކީ "ދަ ޑެވިލް ވެއާސް ޕްރާޑާ" މިއުޒިކަލްއަށް މިއުޒިކް ހަދައިދިން އާޓިސްޓް ކަން ފާހަގަކޮށްލެވެ އެވެ.

ހަބަރުތައް ބުނާ ގޮތުގައި އެލްޓަންގެ ލޮލުގެ ފެނުން ގެއްލިފައިވަނީ މިފަހުން ލޮލުގެ އިންފެކްޝަންއެއް ޖެހި ހާލަތު އިތުރަށް ގޯސްވެގެންނެވެ.

މިދިޔަ ސެޕްޓެމްބަރު މަހު އެލްޓަން ނެރުނު ބަޔާނެއްގައި ބުނެފައިވަނީ އޭނާގެ އެއް ލޮލުގެ ފެނުން އެއްކޮށް ގެއްލިފައިވާ ކަމަށާއި ދެވަނަ ލޮލުގެ ފެނުން ވެސް ފުސްވެފައިވާ ކަމަށެވެ. އެއާއެކު އޭރު އޭނާ ވަނީ ލޮލުގެ ފަރުވާ ކުރިއަށް ގެންދާ ކަމަށް ބުނެ އޭނާއަށް ފަރުވާދޭ ޑޮކްޓަރުންގެ ޓީމަށް ޝުކުރު އަދާކޮށްފަ އެވެ.

އެލްޓަންގެ ޑޮކިއުމެންޓްރީ ރިލީޒް ކުރުމުގެ ހަފްލާގައި އޭނާ ވަނީ ލޮލުގެ ފަރުވާއަކީ މިވަގުތު އޭނާ ފަރުވާ ކުރަމުން އަންނަ ހަމައެކަނި މައްސަލަ ނޫން ކަމަށާއި އޭނާގެ ބަލި ހާލަތު ވަރަށް ދަށް ކަމަށް ބުނެފަ އެވެ.