ހޮލީވުޑްގެ ކާމިޔާބު ފިލްމު ޕްރޮޑިއުސަރު ހާވީ ވެއިންސްޓެއިންގެ ސިއްހީ ހާލަތު ދަށްވެ ކުއްލި ހާލަތުގައި ހޮސްޕިޓަލަށް ގެންގޮސް ފަރުވާ ދެމުން އެބަދެ އެވެ.

ޖިންސީ ފުރައްސާރައިގެ މައްސަލައެއްގައި ނިއުޔޯކްގެ ޖަލެއްގައި ހުކުމް ތަންފީޒު ކުރަމުން އަންނަ ހާވީ ހޮސްޕިޓަލަށް ގެންދެވުނީ މިިދިޔަ ހޯމަ ދުވަހު ހެދި ލޭގެ ޓެސްޓުތަކަކުން ކަންބޮޑުވާން ޖެހޭ ކަންތައްތަކެއް ފެނުމުންނެވެ.

މިހާރުވެސް ލިއުކީމިއާއި ހަކުރު ބައްޔަށް ފަރުވާ ކުރަމުން އަންނަ ހާވީގެ ހާލަތު ރަނގަޅު ވަންދެން ހޮސްޕިޓަލުގައި ބާއްވާނެ ކަމަށް ރިޕޯޓުތައް ބުނެ އެވެ.

ހާވީގެ ވަކީލުން ބުނާ ގޮތުގައި އޭނާ ހުކުމް ތަންފީޒު ކުރަމުން އަންނަ ޖަލުގެ ގައިދީންނަށް އެކަށީގެންވާ ސިއްހީ ފަރުވާއެއް ނުދެވެ އެވެ. އެގޮތުން ހާވީއަށް ލިބުނު ގެއްލުމުގެ ބަދަލުގައި ފަސް މިލިއަން ހޯދަން އޭނާގެ ވަކީލުން ވަނީ ހުށައަޅާފަ އެވެ.

ޖިންސީ ފުރައްސާރަ ކުރުމުގެ ކުށް ސާބިތުވެ ހާވީއަށް 2020 ވަނަ އަހަރު ޖަލު ހުކުމެއް ކުރިމަތިވެފައިވާއިރު އަންނަ އަހަރު އެ މައްސަލައިގެ އިސްތިއުނާފު އަޑުއެހުން އޮންނާނެ އެވެ.

ހާވީއަކީ ހޮލީވުޑްގެ މަޝްހޫރު ފިލްމުތަކެއް ޕްރޮޑިއުސްކޮށް ޑައިރެކްޓްކުރި ފަރާތެކެވެ. އެގޮތުން "ލޯޑް އޮފް ދަ ރިންގްސް" އާއި "ސްޕައި ކިޑްސް" ފަދަ ފިލްމުތައް ފާހަގަކޮށްލެވެ އެވެ.