މަޝްހޫރު އިނގިރޭސި ލަވަކިޔުންތެރިޔާ ބްރިޓްނީ ސްޕިއާސްގެ އެންމެ ފަހުގެ ވީޑިއޯއިން އަނެއްކާ ވެސް އޭނާގެ ސަޕޯޓަރުން ކަންބޮޑުވެއްޖެ އެވެ.

މީގެ ދެތިން ދުވަސް ކުރިން ބްރިޓްނީ އޭނާގެ އިންސްޓަގްރާމްގައި އާއްމުކުރި ވީޑިއޯއެއްގައި ބުނެފައިވަނީ އޭނާއަކީ ފަސް އަހަރުގެ ކުޑަ ކުއްޖެއް ކަމަށާއި ޕްރީ ސްކޫލަށް ވެސް ދާ ކަމަށެވެ.

"އަހަންނަށް މި ފުރެނީ 42 އަހަރެއް ނޫން، ފަސް އަހަރު" މިފަހުން 43 އަހަރު ފުރުނު ބްރިޓްނީ އެ ވީޑިއޯގައި ބުނާ އަޑު އިވެ އެވެ.

ބްރިޓްނީގެ މި ވީޑިއޯއާއެކު އޭނާގެ ނަފްސާނީ ސިއްހަތާމެދު އާއްމުން ދަނީ ކަންބޮޑުވުން ފާޅު ކުރަމުންނެވެ. މީގެ ކުރިންވެސް އޭނާގެ ނަފްސާނީ ސިއްހަތާމެދު ސުވާލު އުފެދޭ ފަދަ ވީޑިއޯތަކާއި ފޮޓޯތައް އާއްމުވެފައިވެ އެވެ.

ބްރިޓްނީގެ އުފަންދުވަހާ ގުޅުވައިގެން ނެރުނު ވީޑިއޯގައި އޭނާ އިތުރަށް ބުނީ އެމެރިކާގެ މީޑިއާތަކުގެ އުނދަގޫ ބޮޑުވުމުން އޭނާގެ ދިރިއުޅުން މެކްސިކޯއަށް ބަދަލު ކޮށްފައިވާ ކަމަށެވެ.

ބްރިޓްނީ އޭނާގެ ދިރިއުޅުމަށް ބޮޑު ބަދަލުތަކެއް ގެނެސްފައިވާއިރު ވަރަށް ފަހުން އެމެރިކާގެ ކޯޓަކުން ވަނީ އޭނާއާއި އޭނާގެ ކުރީގެ ފިރިމީހާ ސޭމް އަސްގަރީގެ ވަރިވެސް ނިންމައިދީފަ އެވެ.