ހޮލީވުޑްގެ މަޝްހޫރު ތަރި ބްރެޑް ޕިޓް އޭނާގެ ދަރިންނާއެކު އޮތް ގުޅުން ރަނގަޅު ކުރަން ވަރަށް ބޮޑަށް މަސައްކަތް ކުރަމުން އަންނަ ކަމަށް ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި ބްރެޑް އަންނަނީ އޭނާގެ ކުރީގެ އަންހެނުން އެންޖެލީނާ ޖޯލީގެ ކިބައިން އެމީހުންގެ ދަރިންނާއެކު އިތުރު ވަގުތު ހޭދަކުރަން ފުރުސަތު ދޭން އާދޭސް ކުރަމުންނެވެ.

އެގޮތުން ކުރިއަށް އޮތް ކްރިސްމަސް ދަރިންނާ ވަކިން ހޭދަކުރަން ބްރެޑް ބޭނުންނުވާ ކަމަށާއި އެހެން ކަމުން ދަރިންނާއެކު އެ ޗުއްޓީ ހޭދަކުރަން މަސައްކަތް ކުރަމުން އަންނަ ކަމަށް ވެސް ހަބަރުތައް ބުނެ އެވެ.

އެއާއެކު ޑިސެމްބަރު މަހުގެ 18 ވަނަ ދުވަހު ފާހަގަކުރާ ބްރެޑްގެ 61 ވަނަ އުފަން ދުވަހުގައި ވެސް އޭނާގެ ދަރިންގެ ބައިވެރިވުން ބޭނުންވާ ކަމަށް ބްރެޑްގެ ގާތް ފަރާތްތަކުން ބުނެފައިވެ އެވެ.

ބްރެޑްއާއި އެންޖެލީނާގެ ކައިވެންޏަށް ޖުމްލަ ހަ ކުދިން ލިބިފައިވާއިރު އެ ދެމީހުންގެ ކައިވެނި ރޫޅުމަށްފަހު ދަރިން އުޅެމުން އަންނަނީ މަންމަ އެންޖެލީނާއާއެކުގަ އެވެ.

ބުނެވޭ ގޮތުގައި ވަރިވުމަށްފަހު ބްރެޑްއާއި އޭނާގެ ދަރިންގެ ގުޅުން ވަރަށް ބޮޑަށް ވަނީ ހީނަރުވެފަ އެވެ. އެގޮތުން ބައެއް ކުދިން އޭނާއާ ވާހަކަ ވެސް ނުދައްކަ އެވެ.