މިފަހުން ރިލީޒް ކުރި އައްލޫ އަރްޖުންގެ ފިލްމު "ޕުޝްޕާ 2: ދަ ރޫލް" ޕްރިމިއާ ކުރި ދުވަހު ހައިދަރް އާބާދުގެ ސަންދްޔާ ތިއޭޓަރުގައި ވަނީ ތޮއްޖެހުމުގެ ހާދިސާއެއް ހިނގާފަ އެވެ.

އެ ޕްރިމިއާއަށް އައްލޫއާއި އޭނާގެ އާއިލާ ގޮސްފައިވާއިރު އޭނާ ދެކިލަން އެތައް ހާސް ބަޔަކު އެ ތިއޭޓަރަށް އެއްވި އެވެ. ނަތީޖާއެއްގެ ގޮތުން މުޅި ހިސާބުގަނޑު ތޮއްޖެހި ގިނަ ބަޔަކަށް އަނިޔާވި އެވެ.

އެގޮތުން އެތަނަށް ދިޔަ އަންހެނަކު މީހުންގެ ތެރޭގައި ފިތި ބާރުވެ މަރުވެސް ވެފައިވެ އެވެ. އެ ހާދިސާގައި އޭނާގެ އެ މީހާގެ ދަރިފުޅަށް ވެސް އަނިޔާވެ ހޮސްޕިޓަލުގައި ފަރުވާ ދިނެވެ.

މިކަމާ ގުޅޭގޮތުން ފިލްމުގެ ލީޑު ތަރި އައްލޫ ޓްވިޓާގައި ނެރުނު ބަޔާނެއްގައި ބުނެފައިވަނީ އޭނާއަށް ހާދިސާގެ ހަބަރު ލިބިފައިވަނީ ޖެހިގެން އައި ދުވަހުގެ ހެނދުނު ކަމަށާއި ކަންތައް ވީ ގޮތާމެދު ހިތާމަކުރާ ކަމަށެވެ.

އެއާއެކު އެ އަންހެން މީހާގެ އާއިލާއަށް ބޭނުންވާ އެހީތެރިކަން އޭނާގެ އަމިއްލަ ބެލުމުގެ ދަށުން ކުރިއަށް ގެންދާނެ ކަމަށް ވެސް އައްލޫ ބުނެފައިވެ އެވެ.

ޕުޝްޕާ 2 މިހާރު ސިނަމާތަކުގައި ދައްކަމުން އަންނައިރު އެ ފިލްމަށް ގިނަ ބައެއްގެ ތަރުހީބު އަންނަނީ ލިބެމުންކަން ފާހަގަކުރެވެ އެވެ.