ބޮލީވުޑްގެ މަޝްހޫރު ތަރި ދީޕިކާ ޕަދުކޯންގެ އަލަތު ދަރިފުޅު ވިހެއުމަށްފަހު އެންމެ ފުރަތަމަ ފަހަރަށް ކޮންސެޓެއްގެ ތެރެއިން ފެނިއްޖެ އެވެ.

މިދިޔަ ހުކުރު ދުވަހު ބެންގަލޫރުގައި އޮތް ދިލްޖީތު ދޯސަންޖްގެ ކޮންސެޓެއްގައި ބައިވެރިވި ދީޕިކާ ވަނީ ސްޓޭޖުގައި ވެސް ދިލްޖީތުއާއެކު ވަގުތުކޮޅެއް ހޭދަކޮށްފަ އެވެ. އޭގެ އިތުރުން ވެސް ކޮންސެޓުގެ ތެރެއިން ދީޕިކާ އުފާ ފާޅުކޮށް ނަށާ މަންޒަރު ފެންނަ ވީޑިއޯތައް ވެސް މިހާރު ސޯޝަލް މީޑިއާގައި ދަނީ ދައުރުވަމުންނެވެ.

މި ވީޑިއޯތައް އާއްމުވުމާއެކު ދަރިފުޅަށް ތިން މަސް ނުފުރެނީސް ދީޕިކާ ކޮންސެޓުތަކަށް ދާން ފެށީ ކަމަށް ބުނެ އޭނާއަށް ބައެއް މީހުން ފާޑު ކިޔަމުން އަންނަ ނަމަވެސް ގިނަ މީހުން ބުނަމުން އަންނަނީ އަލަތު މައިންނަށް ވެސް އަމިއްލަ ވަގުތު ބޭނުންވާނެ ކަމަށެވެ.

މިދިޔަ ސެޕްޓެމްބަރު މަހުގެ 8 ވަނަ ދުވަހު ދީޕިކާ އޭނާގެ އަލަތު ދަރިފުޅު ވިހާފައިވާއިރު ފާއިތުވި ދެ މަސް ދުވަހު އާއްމު އެއްވެސް ތަނަކުން ދީޕިކާ ފެނިފައެއް ނުވެ އެވެ.

ދީޕިކާގެ ފިލްމީ މަސައްކަތްތަކަށް ބަލާއިރު އޭނާ އެންމެ ފަހުން ފެނިފައިވަނީ މިއަހަރުގެ ޖޫން މަހު ރިލީޒް ކުރެވުނު "ކަލްކީ 2898" އިންނެވެ.

އެއަށްފަހު އޭނާ މެޓާނިޓީ ބްރޭކަކަށް ގޮސްފައިވާއިރު ކުރިއަށް އޮތް ދުވަސްތަކުގައި ވެސް އޭނާގެ އިތުރު މަސައްކަތެއް ފެންނާނެ ކަމަކަށް ނުބެލެވެ އެވެ.