ސީރިޔާގެ ސަރުކާރާއި ދެކޮޅު ހަނގުރާމަވެރިންގެ ޖަމާއަތަކުން ބައްޝާރުލް އަސަދުގެ ވެރިކަން ބަދަލުކުރުމަށް ތާއީދުކުރައްވާ ކޮންސްޓްރަކްޝަން މިނިސްޓަރު އަބްދުﷲ މުއްތަލިބު މިއަދު ކުރެއްވި އެކްސް ޕޯސްޓު ޑިލީޓު ކުރައްވައިފި އެވެ.

ޕޯސްޓުގައި މުއްތަލިބު ވިދާޅުވީ ސީރިޔާގެ އަހުންނާއި އުހުތުން އެތައް ޒަމާނެއް ވަންދެން އަނިޔާވެރިކަން ތަހައްމަލުކޮށްފައިވާ ކަމަށެވެ. އަދި މިއީ އެ ގައުމުގައި އަމާންކަމާއި ކުރިއެރުމުގެ ޒަމާނެއް ފެށުން ކަމުގައި ލެއްވުމަށް އެދި ދުއާ ކުރައްވާކަމަށެވެ.

މިނިސްޓަރު މުއްތަލިބު ޑިލީޓް ކުރެއްވި އެކްސް ޕޯސްޓް

ނަމަވެސް ހެނދުނު މިނިސްޓަރު ކުރެއްވި ޕޯސްޓް މިހާރު ވަނީ ޑިލީޓް ކުރައްވައިފަ އެވެ.

ސީރިޔާ ގައި ބައިގަރުނުވީ ބައްޝަރުލް އަސަދުގެ އާއިލީ ވެރިކަން ނިމިއްޖެކަމަށް ސަރުކާރާ ދެކޮޅު ހަނގުރާމަވެރިންގެ ކޯލިޝަނުން މިއަދު ވަނީ އިއުލާނުކޮށްފަ އެވެ. ރޭގެ ވަގުތެއްގައި ހަނގުރާމަވެރިން ސީރިޔާގެ ވެރިރަށް ދިމިޝްގަށް ވަނުމާއެކު އެގައުމުގެ ރައީސް އަސަދު ވަނީ ފިއްލަވައިގެން ގައުމު ދޫކުރައްވާ ވަޑައިގެންފަ އެވެ.