މިދިޔަ އޮކްޓޯބަރު މަހު ރިލީޒް ކުރެވުނު ކާމިޔާބު ދިވެހި ފިލްމު "ބިބީ"ގެ ވަދާއީ ދެ ޝޯ މިމަހުގެ 19 އަދި 20 ވަނަ ދުވަހު އަޅުވަން ހަމަޖައްސައިފި އެވެ.

ޑާކްރެއިން އެންޓަޓެއިންމަންޓުން މައުލޫމާތު ދިން ގޮތުގައި "ބިބީ"ގެ އިތުރު ދެ ޝޯ އަޅުވަން ނިންމާފައި މިވަނީ މިހާތަނަށް އެ ފިލްމު ނުބަލާ މީހުންނަށް އެ ފުރުސަތު ދިނުމުގެ ގޮތުންނެވެ.

އޮކްޓޯބަރު މަހު "ބިބީ" ފުރަތަމަ އެޅުވި ދުވަސްވަރު ވެސް އެ ފިލްމަށް އާއްމުންގެ ބޮޑު ތަރުހީބެއް ލިބިފައިވާ ކަން ފާހަގަކޮށްލެވެ އެވެ.

އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ ޑައިރެކްޓްކުރި އެ ފިލްމުގެ މުހިއްމު ރޯލުތަކުން ފެނުނު ތަރިންގެ ތެރޭގައި މަރިޔަމް މަޖުދާ، ޝަރަފު އަބްދުﷲ، އަބްދުﷲ ޝާފިއު (ފުބޫ)، އަހުމަދު ސައީދު އަދި ޝީލާ ނަޖީބު ހިމެނެ އެވެ.

ހޮރޯ ކޮމެޑީއެއްގެ ގޮތުގައި ގެނެސްދިން "ބިބީ"ގެ ޝޯތަކެއް މިދިޔަ މަހު ސްޕެއިންއާއި އިޓަލީގައި ވެސް އެ ގައުމުތަކުގެ ބަހުން ސަބްޓައިޓަލްސްއާއެކު އަޅުވާފައިވެ އެވެ.

ޑާކްރެއިންގެ އެހެން މަސައްކަތްތަކަށް ބަލާއިރު މިއަހަރު އެ ސްޓޫޑިއޯއިން ގެނެސްދިން ފުރަތަމަ ފިލްމަކީ އެކްޝަން ތުރިލާ "ފުރޭތަ" އެވެ. އެއަށްފަހު މިހާރު އެ ސްޓޫޑިއޯގެ ކުރިއަށް އޮތް ފިލްމަކީ "ރޯލީމޭ" އެވެ.