ޓެކްނޮލޮޖީގެ ހަލުވި ތަރައްގީއާއެކު އިންސާނުންގެ ސިކުނޑި ހައިރާން ކޮށްލާ ފަދަ އެތައް އީޖާދުތަކެއް ދަނީ ތައާރަފް ވަމުންނެވެ. ޖަޕާނަކީ މިފަދަ އީޖާދުތައް ތައާރަފް ކުރުމުގައި އެންމެ ކުރީގައި އުޅޭ އެއް ގައުމެވެ.

އެގޮތުން އެ ގައުމުން މިވަނީ އަނެއްކާ ވެސް ޓެކްނޮލޮޖީގެ އަޖާއިބެއް އީޖާދު ކޮށްފަ އެވެ. މިފަހަރު އެ ގައުމުން އުފެއްދީ އިންސާނުން ފެންވަރުވައިދޭ "ހިއުމަން ވޮޝިން މެޝިން" އެކެވެ.

ޖަޕާނުގެ އޮސާކާގައި ހިންގާ ކުންފުންޏެއް ކަމަށްވާ ސައިންސް ކޯއިން އީޖާދުކުރި އެ އުފެއްދުމަކީ 15 މިނެޓު ތެރޭގައި އިންސާނުން ފެންވަރުވައި ހިއްކައިދޭނެ މެޝިނެކެވެ.

އެގޮތުން އެ މެޝިނުގައި އެކި ގޮތްގޮތަށް ފެންވެރޭނެ ފީޗާތައް އެކުލެވިފައިވާނެ ކަމަށާއި ބޭނުންވާ ގޮތަކަށް ފެންވެރުމުގެ ފުރުސަތު އެ މެޝިނުން ލިބޭނެ ކަމަށް އެ ކުންފުނިން ބުނެ އެވެ.

އެ ކުންފުނިން އިތުރަށް ބުނީ ބަލާބެލުމަށް އެތެރެ ފެންނަ ކޮކްޕިޓެއްގެ ސިފައިގައި ފެންނަ އެ ބާތިން ޕޮޑްއަކީ އިންސާނުންގެ އާއްމު ދިރިއުޅުމުގެ ފެންވަރު ރަނގަޅު ކޮށްދޭޭނެ އީޖާދެއް ކަމަށެވެ.

ކުރިއަށް އޮތް އޮސާކާ ކަންސައި އެކްސްޕޯގައި މި މެޝިން އާއްމުކޮށް ދައްކާލަން ތައްޔާރު ވަމުން އަންނައިރު އެކްސްޕޯގެ ކޮންމެ ދުވަހަކު ވެސް ހައެއްކަ މީހުންނަށް އެ މެޝިން ތަޖުރިބާ ކޮށްލުމުގެ ފުރުސަތު ލިބޭނެ އެވެ.

ހިއުމަން ވޮޝިން މެޝިން އާއްމުކޮށް ބާޒާރަށް ނުކުންނާނެ ދުވަހެއް އަދި ނޭނގުނު ނަމަވެސް މިއީ ޓެކްނޮލޮޖީއަށް އިންގިލާބެއް ގެނުވާނެ އުފެއްދުމެއް ކަމުގައި މާހިރުން ބުނެ އެވެ.