އެތައް ގަރުނެއް ވެފައިވާ އާސާރީ ހަނގުރާމައިގެ މައިދާނެއް އިރާގުގެ ބިމުން ފެނިއްޖެ ކަމަށް އާކިއޮލޮޖިސްޓުންގެ ޓީމަކުން ބުނެފި އެވެ.
އެމެރިކާގެ ޖާސޫސީ ސެޓެލައިޓްގެ ޑީކްލެސިފައިޑް ފޮޓޯތަކަކުން ފާހަގަވެފައިވާ އެ ހަނގުރާމައިގެ މައިދާނަކީ އިރާގުގެ ތާރީހާ ގުޅިފައިވާ ހަނގުރާމައިގެ މައިދާނެކެވެ.
އެ މައިދާނުގައި މީލާދީ ގޮތުން 636 އޭޑީގައި ހިނގި އަލްގަދިސިއްޔާ ހަނގުރާމައަކީ އަރަބި މުސްލިމުންނަށް ބޮޑު ކާމިޔާބެއް ލިބުނު ހަނގުރާމައެއް ކަމަށް ތާރީހު ދިރާސާކުރާ އިލްމުވެރިން ވިދާޅުވެ އެވެ.
ސަސާނިއާ ރަސްކަމާ ދެކޮޅަށް ކުރެވުނު އެ ހަނގުރާމައިގައި އަރަބިންނަށް ލިބުނު ކާމިޔާބާއެކު އެ ސަރަހައްދުގައި މުސްލިމުންގެ ބާރު އިތުރަށް ގަދަވެގެން ދިޔަ އެވެ.
ރިޕޯޓުތައް ބުނާ ގޮތުގައި އެ މައިދާނުން ހަނގުރާމައިގެ ދިފާއަށް ބޭނުންކުރާ ފާރުތަކާއި އެނޫންވެސް ހަނގުރާމައިގެ އެކި ސިފަތައް ހާމަވާ ކަންކަން ފެނިފައިވެ އެވެ.
އެ މައިދާނުގެ މިއަދުގެ ހާލަތަށް ބަލާއިރު އެ ބިން މިހާރު ބޭނުން ކުރެވެނީ ދަނޑުވެރި ކަމަށެވެ. އެގޮތުން ދަނޑުވެރިކަމުގެ ބޭޭނުންތަކަށް ހަނގުރާމައާ ގުޅުންހުރި ގިނަ އެއްޗެހިތަކެއް ނައްތާލެވިފައިވާ ކަމަށްވެސް ބެލެވެ އެވެ.
މި ކަމުގައި ހަރަކާތްތެރިވާ ސައިންސްވެރިން ބުނާ ގޮތުގައި މި މައިދާން ފާހަގަވުމަކީ މެދުއިރުމަތީގެ ތާރީހު ދެނެގަތުމަށް ކުރާ މަސައްކަތަށް ލިބުނު އިތުރު ބާރެކެވެ.
