ބޮލީވުޑްގެ ތާރީހު ދުށް އެންމެ ކުޅަދާނަ އެއް އާޓިސްޓް ކަމަށްވާ ރާޖް ކަޕޫރުގެ ޝަރަފުގައި ބާއްވާ "ރާޖް ކަޕޫރު ފިލްމު ފެސްޓިވަލް" ފަށައިގެން ކުރިއަށް އެބަދެ އެވެ.

ރާޖް ކަޕޫރުގެ 100 ވަނަ އުފަންދުވަހުގެ މުނާސަބަތުގައި މިދިޔަ ހުކުރު ދުވަހުން ފެށިގެން ތިން ދުވަހުގެ މުއްދަތަށް ކުރިއަށް ގެންދާ ފެސްޓިވަލް ކުރިއަށްދަނީ މުމްބާއީގެ މަލްޓިޕްލެކްސް ސިނަމާއެއްގަ އެވެ.

މި ފެސްޓިވަލްގެ ތެރެއިން ރާޖް ކަޕޫރުގެ މަޝްހޫރު ކްލެސިކް ފިިލްމުތައް ސިނަމާގައި ބަލާލުމުގެ ފުރުސަތު ލިބޭނެ އެވެ. އޭގެ ތެރޭގައި "މޭރާ ނާމް ޖޯކަރް"، "އާވާރާ" އަދި "ބޮބީ" ފަދަ ކާމިޔާބު ފިލްމުތައް ހިމެނެ އެވެ.

ހުކުރު ދުވަހު ބޭއްވި އެ ފެސްޓިވަލް ހުޅުވުމުގެ ރަސްމިއްޔާތުގައި ކަޕޫރު އާއިލާގެ މެމްބަރުންގެ އިތުރުން ބޮލީވުޑްގެ މަޝްހޫރު ބައެއް ތަރިން ބައިވެރިވެފައިވެ އެވެ.

އެގޮތުން ރާޖް ކަޕޫރުގެ ދަރިފުޅު ރަންދީރު ކަޕޫރުއާއި އޭނާގެ އަންހެނުން ބަބީތާ، ކާފަ ދަރިން ކަމަށްވާ ކަރީނާ ކަޕޫރު، ކަރިސްމާ ކަޕޫރު އަދި ރަންބީރު ކަޕޫރުގެ ދެމަފިރިންގެ އިތުރުން ރޭކާ ފަދަ ތަރިން އެ ހަފްލާއިން ފެނިގެންދިޔަ އެވެ.

އެ ހަފްލާ އިތުރަށް ހާއްސަވެގެން ދިޔައީ ރާޖް ކަޕޫރުގެ މަޝްހޫރު ބައެއް ލަވަތައް އެކޯސްޓިކް ބޭންޑަކުން ކުޅެމުން ދިޔައީމަ އެވެ. އޭގެ ތެރޭގައި "މޭރާ ޖޫތާހޭ ޖަޕާނީ" އަދި "ޖީނާ ޔަހާން މަރްނާ ޔަހާން" ފަދަ ލަވަތައް ހިމެނެ އެވެ.

ރާޖް ކަޕޫރަކީ 1950ގެ އަހަރުތަކާއި 60ގެ އަހަރުތަކުގައި ބޮލީވުޑުން މަގުބޫލުކަން ހޯދި ފަންނާނެކެވެ. އޭނާގެ ލަވަތަކަކީ މިއަދު ވެސް ގިނަ ބަޔަކު ލޯބިކުރާ ލަވަތަކެކެވެ.