ކުރިއަށް އޮތް 20 އަހަރުގެ ތަރައްޤީގެ ޕްލޭން އެކުލަވާލުމުގެ މަސައްކަތް ކޮށްދޭނެ ލޯކަލް ކޮންސަލްޓެންސީ ފާމެއް ހޯދުމަށް އިއުލާން ކޮށްފި އެވެ.

ފިނޭންސް މިނިސްޓްރީން ވަނީ އެ މަސައްކަތް ކޮށްދޭނެ ބައިނަލްއަޤްވާމީ ކޮންސަލްޓަންސީ ފާމެއް ހޯދުމަށް މި މަހުގެ އެއްވަނަ ދުވަހު އިއުލާންކޮށްފަ އެވެ.

މިއަދު ކުރި އިއުލާންގައި ވަނީ 20 އަހަރުގެ ގައުމީ ތަރައްގީގެ ޕްލޭނެއް އެކުލަވާލުމަށް ބޭނުންވާ ލޯކަލް ކޮންސަލްޓެންސީ ފާމްތަކުގެ ތެރެއިން ޝަރުތު ހަމަވާ ހުރިހާ ފަރާތްތަކަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމަށް ފުރުސަތު ހުޅުވާލާފަ އެވެ.

މި މަސައްކަތުގެ މައިގަނޑު މަގްސަދަކީ ކުރިއަށް އޮތް 20 އަހަރު ދުވަހުގެ ތެރޭގައި ދިވެހިރާއްޖޭގެ ދެމެހެއްޓެނިވި އިޤްތިޞާދީ، އިޖްތިމާޢީ، ތިމާވެށި، އަދި އާބަން ޑިވެލޮޕްމަންޓުގެ ޤައުމީ ތަރައްޤީގެ ޕްލޭނެއް އެކުލަވާލުމެވެ. އަދި މި ޕްލޭންގައި ނެޝަނަލް ޑިވެލޮޕްމަންޓް ޕްލޭން ފައިދާހުރި ގޮތެއްގައި ތަންފީޛުކުރުމާއި، މޮނިޓާ ކުރުމާއި، އިވެލުއޭޓް ކުރެވޭނެ މެކޭނިޒަމްތައް ހިމަނަންވާނެ ކަމަށް ފިނޭންސް މިނިސްޓްރީން ބުނެފައިވެ އެވެ.

އެހެންވެ މި މަސައްކަތައް ޝައުގުވެރިވާ ފަރާތްތަކުން މަސައްކަތް ކުރުމުގެ ގާބިލްކަން ސާބިތުކޮށްދޭ ލިޔެކިޔުންތައް ހުށަހެޅުމަށް ވަނީ ހުޅުވާލާފަ އެވެ. ހުށަހަޅަންޖެހޭ ލިޔުންތަކުގެ ތެރޭގައި ކުންފުނީގެ ފަންނީ ގާބިލްކަން، ދާއިރާއިން ކޮށްފައިވާ މަސައްކަތްތަކުގެ ތަފްސީލް، މަސައްކަތްތަކުގެ އަގު އަދި މިފަދަ މަސައްކަތެއް ކުރުމުގެ ހުނަރާއި ގާބިލުކަން ހުރި މިންވަރު އެނގޭފަދަ ލިޔުންތައް ހިމެނެ އެވެ.

އިއުލާންގައިވާ ގޮތުން މާސްޓާޕްލޭން އެކުލަވާލުމަށް ޕްރޮޕޯސަލް ހުށަހަޅަން ފުރުސަތު ދިނުމަށް ހަމަޖެހިފައިވަނީ މި މަސައްކަތަށް ޝައުގުވެރިކަން ފާޅުކުރާ ފަރާތްތަކުގެ ތެރެއިން ޝޯޓް ލިސްޓް ކުރެވޭ ފަރާތްތަކަށް އެކަންޏެވެ.

މިމަސައްކަތްތަކާ ގުޅޭ މައުލޫމާތު ހިމެނޭ ގޮތަށް ތައްޔާރުކޮށްފައިވާ ޓާމްސް އޮފް ރިފަރެންސް (ޓީއޯއާރް) ފިނޭންސް މިނިސްޓްރީގެ ވެބްސައިޓުން ޑައުންލޯޑް ކުރެވޭނެ ގޮތް ވަނީ ހަމަޖައްސާފަ އެވެ. މިމަސައްކަތާ ގުޅިގެން ދޫކުރެވޭ އެންމެފަހުގެ މައުލޫމާތުތައް ފިނޭންސް މިނިސްޓްރީގެ ވެބްސައިޓް މެދުވެރިކޮށް ހޯދުމަކީ ބީލަމަށް ކުރިމަތިލާ ފަރާތުގެ ޒިންމާއެއް ކަމަށްވެސް އިއުލާންގައިވެ އެވެ.

މާސްޓާޕްލޭން ހަދައިދިނުމަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓަރެސްޓް ހުށަހަޅަންޖެހެނީ އަންނަ ޖެނުއަރީ 7 ގެ މެންދުރުފަހު 2:00ގެ ކުރިން އީމެއިލް މެދުވެރިކޮށެވެ.

ފާހަގަކޮށްލެވޭ ގޮތުގައި ޤައުމީ ތަރައްޤީގެ 20 އަހަރުގެ މާސްޓާ ޕްލޭންގެ މަޝްވަރާ ބައްދަލުވުން މިދިޔަ މަހުގެ 6 ވަނަ ދުވަހު ފަށާފައިވެ އެވެ. ގައުމީ ތަރައްގީގެ މާސްޓާ ޕްލޭން އެކުލަވައިލުމުގައި އެހީތެރިކަން ފޯރުކޮށްދިނުމަށް އޮސްޓްރޭލިއާއާއެކު ވެސް ވަނީ ހައުސިން މިނިސްޓްރީން އެއްބަސްވުމެއްގައި ސޮއިކޮށްފަ އެވެ.