ބޮލީވުޑްގެ މަޝްހޫރު އެކްޓަރު އަދި ޑިރެކްޓަރު ސޯނޫ ސޫދުގެ ކުރިއަށް އޮތް ފިލްމު "ފަތޭހް"ގެ އާމްދަނީ ޔަތީމު ޚާނާތަކާއި އުމުރުން ދުވަސްވީ މީހުން ބަލާ މަރުކަޒުތަކަށް ހަދިޔާކުރަން ނިންމައިފި އެވެ.

މިކަމާ ބެހޭގޮތުން ވާހަކަ ދައްކަމުން ސޯނޫ ބުނީ އޭނާގެ ސަބަބުން ބޭނުން ޖެހިފައިވާ ފަރާތްތަކަށް އެހީތެރިކަން ފޯރުކޮށްދެވޭތީ އުފާކުރާ ކަމަށެވެ.

އަންނަ އަހަރު ރިލީޒް ކުރަން ހަމަޖެހިފައިވާ "ފަތޭހް"ގައި އެކްޓަރެއްގެ ގޮތުގައި ސޯނޫ ފެންނައިރު އެ ފިލްމު ލިޔެ ޑައިރެކްޓްކުރީ ވެސް ހަމަ ސޯނޫ އެވެ. އޭނާގެ އިތުރުން އެ ފިލްމުން ދެން ފެންނަ ތަރިންގެ ތެރޭގައި ޖެކޮލީން ފެރްނާންޑޭޒް، ވިޖޭ ރާޒް އަދި ނަސީރުއްދީން ޝާހް ފަދަ ތަރިން ހިމެނެ އެވެ.

މިހާރު މުޖުތަމައުގައި އާއްމުވަމުން އަންނަ އޮންލައިން ކުށްތައް ނުވަތަ "ސައިބާ ކްރައިމްސް"އަށް އަލިއަޅުވާލާ މި ފިލްމަކީ ޝައުގުވެރި ފިލްމަކަށްވާނެ ކަމަށް ސޯނޫ ބުނެ އެވެ.

ސޯނޫއަކީ އަބަދުވެސް އޭނާގެ ދީލަތި ކަމަށްޓަކައި އާއްމުންގެ ތައުރީފު ލިބޭ ތަރި އެކެވެ. މީގެ ކުރިން ވެސް އޭނާ ވަނީ ފަގީރުންނަށް އެކިފަހަރު މަތިން އެހީވެދީފަ އެވެ.