ރާއްޖެއިން ބޭރުގެ އެކި ގައުމުތަކުގެ އެމްބަސީތަކުގައި ޖުމްލަ 103 ސިޔާސީ މުވައްޒަފުން ތިބިކަން ހާމަވެއްޖެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "ހުރިހާ" އިން ހޯދަން އެދުނު މައުލޫމާތުގެ ޖަވާބުގައި ފޮރިން މިނިސްޓްރީން ބުނެފައި ވަނީ މާލޭގައި މަސައްކަތްކުރާ 26 ސިޔާސީ މުވައްޒަފުންނާއެކު ޖުމްލަ 129 ސިޔާސީ މުވައްޒަފުން މިދިޔަ ނޮވެމްބަރު މަހާ ހަމައަށް އެ މިނިސްޓްރީގެ ދަށުން މަސައްކަތް ކުރަމުން އަންނަ ކަމަށެވެ. އޭގެތެރެއިން 103 ސިޔާސީ މުވައްޒަފުންނަކީ އެކި އެކި އެމްބަސީތަކުގައި މަސައްކަތް ކުރާ މީހުންނެވެ.

އެންމެ ގިނަ ސިޔާސީ މުވައްޒަފުން ތިބި އެމްބަސީއަކީ މެލޭޝިޔާ އެވެ. އެ ގައުމުގައި ހުންނަ ދިވެހި އެމްބަސީގައި 25 ސިޔާސީ މުވައްޒަފުން އެބަތިއްބެވެ. ދެވަނައަށް އެންމެ ގިނަ ސިޔާސީ މުވައްޒަފުން ތިބި ސްރީލަންކާގެ އެމްބަސީގައި 18 މީހުން އެބަތިއްބެވެ. ދެން އެންމެ ގިނަ ސިޔާސީ މުވައްޒަފުން ތިބީ ތައިލޭންޑްގައި ހުންނަ ދިވެހި އެމްބަސީގަ އެވެ. އެއީ ޖުމްލަ 10 ސިޔާސީ މުވައްޒަފުންނެވެ.

މި މުވައްޒަފުންގެ މުސާރައަށް މަހެއްގެ މައްޗަށް ޖުމްލަ ހަރުވާ އަދަދު ހޯދަން "ހުރިހާ" އިން އެދިފައިވިޔަސް އެ މައުލޫމާތު ފޮރިން މިނިސްޓްރީން ހިއްސާކޮށްފައެއްނުވެ އެވެ.