މިއަދަކީ ހިނގަމުންމިދާ ދިރާސީ އަހަރުގެ ފުރަތަމަ ޓާމުގެ މިޑްޓާމް ބްރޭކް ފެށޭ ދުވަހެވެ. ކުރިއަށް އޮތް ދެ ހަފްތާއެއްހާ ދުވަސް ސްކޫލުތައް ބަންދުވާއިރު މި ޗުއްޓީގައި ވެސް ރާއްޖެއިން ބޭރަށް ދަތުރުކުރާ މީހުން ވަރަށް ގިނަ އެވެ.

މިގޮތަށް ދަތުރު ކުރާއިރު އަތްމަތީގައި ގެންގުޅޭ ތަކެތި ގެއްލުމަކީ އާއްމު ކަމެކެވެ. މިފަހަރު މި ބަލާލަނީ ދަތުރު ކުރާއިރު އަމިއްލަ މުދާ ރައްކާތެރި ކުރާނެ ބައެއް ގޮތްތަކަށެވެ.

އެންމެ ފުރަތަމަ ކަމަކަށް މަތިންދާ ބޯޓެއްގައި ދަތުރު ކުރާއިރު އަތްމައްޗަށް ނަގާ ދާގީނާތައް އިށީންނަން ހަމަޖެހިފައިވާ ސިޓާ ދިމާލުން އަނެއް ފަރާތުގެ އޯވާހެޑް ކެބިންއަކަށް ލާށެވެ. އެގޮތުގެ މަތިން އެތަކެއްޗަށް ސަމާލުކަން ދެވޭނެ އެވެ.

މީގެ އިތުރުން ވޮލެޓާއި ޕާސްޕޯޓް ފަދަ އަގުބޮޑު ތަކެތި ދަބަހަކަށް ލުމުގެ ބަދަލުގައި ލައިގެން ހުންނަ އަންނައުނުގެ ޖީބަށް ލުން ރަނގަޅުވާނެ އެވެ. މިގޮތަށް ލާއިރު ނުވެއްޓޭނެހެން ޖީބުގެ ޒިބު ނުވަތަ ގޮށް އެޅުވުން މުހިއްމެވެ.

އެފަދަ ޖީބެއް ނެތްނަމަ ހަށިގަނޑުގެ އެއްފަރާތުން އަނެއް ފަރާތަށް އަޅުވާ އަތް ދަބަސް ނުވަތަ "ކްރޮސް ބޮޑީ ބޭގް"އަކަށް އެތަކެތި ލުން އެދެވިގެންވެ އެވެ. އެފަދަ ދަބަސްތައް އަޅުވާފައި ހުންނަ ގޮތުން ޖަހައިގަންނަން އުނދަގޫވާނެ އެވެ.

މަތިންދާ ބޯޓަށް އެރުމަށްފަހުއާއި ފޭބުމުގެ ކުރިން އަތްމަތީ ދަބަސްތައް ހަމައަށް ހުރިތޯ ބެލުމަކީ ވެސް ވަރަށް މުހިއްމު ކަމެކެވެ. ނެތްނަމަ ވީ އެންމެ އަވަހަކަށް ކެބިން ކްރޫއަކަށް އަންގަންވާނެ އެވެ.

މިހުރިހާ ކަމަކާއެކު ދާގީނާތަކަށް ސަމާލުވެ ހިނގާފާނެ ހާދިސާއަކަށް ތައްޔާރުވެ ތިބުމަކީ ވައިގެ މަގުން ދަތުރެއް ކުރާއިރު އެންމެ މުހިއްމު ކަންތަކެވެ.