ބޮލީވުޑްގެ ޒުވާން ތަރި އަނަންޔާ ޕާންޑޭ އަންނަނީ އޭނާގެ ފިލްމީ މަސައްކަތްތަކުން ގިނަ ބައެއްގެ ތައުރީފު ހޯދަމުންނެވެ. އޭނާ އެންމެ ފަހުން ފެނިފައިވަނީ "ކޯލް މީ ބޭ" އިންނެވެ.

ފިލްމީ މަސައްކަތްތަކުގެ އިތުރުން އަނަންޔާގެ ޒާތީ ދިރިއުޅުމަކީ ވެސް މީޑިއާގެ ސަމާލުކަން ހޯދާ ކަމެކެވެ. އަދިތުޔާ ރޯއީ ކަޕޫރުއާ ކުޑަ ދުވަސްކޮޅަކަށް ރައްޓެހިވެގެން އުޅުނު ކަމަށް އަޑުއެރި ނަމަވެސް މާ ގިނަ ދުވަހެއް ނުވެ އެގުޅުން ވަނީ ނިމިފަ އެވެ.

ދާދި ފަހުން އިންޑިއާގެ ނޫހަކަށް ދިން އިންޓަވިއުއެއްގައި އަަނަންޔާ މިވަނީ އަލުން މީހަކާ ރައްޓެހިވެގެން އުޅޭކަމުގެ އިޝާރާތެއް ދީފަ އެވެ.

އޭނާ ބުނެފައިވަނީ 2024 ވަނަ އަހަރަކީ އޭނާއަށް ވަރަށް ލޯބި ލިބުނު އަހަރެއް ކަމަށާއި ކުރިއަށް އޮތް އަހަރުގައި ވެސް އެ ލޯބި ލިބޭނެ ކަމަށް އުއްމީދުކުރާ ކަމަށެވެ.

ބުނެވޭ ގޮތުގައި އަނަންޔާގެ އާ ލޯބިވެރިޔަކީ އެމެރިކާގެ ޗިކާގޯއަށް ނިސްބަތްވާ ކުރީގެ މޮޑެލްއެއް ކަމަށްވާ ވޯކާ ބްލޭންކޯ އެވެ. އެ ދެމީހުން ވަނީ މިއަހަރުގެ ކުރީކޮޅު އޮތް އަނަންތު އަމްބާނީގެ ކައިވެންޏަށް ވެސް އެކުގައި ގޮސްފަ އެވެ.

ސީދާ ގޮތެއްގައި ވޯކާއާ ލޯބީގެ ގޮތުން ގުޅިގެން އުޅޭކަން އަނަންޔާ ޔަގީން ކޮށް ނުދިން ނަމަވެސް އެ ދެމީހުންގެ ސޯޝަލް މީޑިއާއާއި އާއްމު ފެނިލުންތަކުން އެއީ ތެދެއްކަން ގިނަ ބަޔަކު ޔަގީންކުރެ އެވެ.