ކުރިއަރަމުން އަންނަ މި ދުނިޔޭގައި ބޭސްވެރިކަމުގެ ދާއިރާގައި ވެސް އެތައް އީޖާދުތަކަކާއި ހޯދުންތަކެއް ދަނީ ހޯދަމުންނެވެ. މީގެ ތެރެއިން ބައެއް ހޯދުންތަކަކީ އިންސާނިއްޔަތަށް ބޮޑެތި އިންގިލާބުތައް ގެނައުމުގެ ގާބިލިއްޔަތުކަން ލިބިފައިވާ ހޯދުންތަކެވެ.

އެފަދަ އެއް ހޯދުމަކީ ސްޓެމް ސެލް ތެރަޕީގެ ފަރުވާ އެވެ. ސައިންޓިފިކް ގޮތުން "ރިޖެނެރެޓިވް ތެރަޕީ"ގެ ނަން ދެވިފައިވާ މި ފަރުވާއަކީ ކުރިއަށް އޮތް ތަނުގައި ބޭސްފަރުވާގެ ފެންވަރު އެތައް ގުނައަކަށް ރަނގަޅު ކުރެވޭނެ ފަރުވާ އެކެވެ.

ސްޓެމް ސެލްއަކީ ހަށިގަނޑުގައިވާ ސެލްތަކުގެ ތެރެއިން ހަލާކުވެ ބަދަލެއް އައިސްފައިނުވާ ހަށިގަނޑުގެ ކޮންމެ ސެލްއަކަށް ވެސް ބަދަލުވުމުގެ ގާބިލުކަން ލިބިފައިވާ ސެލްތަކެކެވެ.

މި ސެލްތަކުން ހަށިގަނޑުގެ ގެއްލުންވެފައިވާ ސެލްތަކާއި ގުނަވަންތަކަށް ދިރުން ގެނުވައި ދާއިމީ ބަލިތަކަށް އޮތް ފަރުވާއެއްގެ އުއްމީދު އާކޮށްދެ އެވެ.

އެގޮތުން، ތެލެސީމިއާ އާއި ލިއުކީމިއާ ފަދަ ލޭގެ ބަލިތަކުގެ ފަރުވާ ކަމުގައިވާ ބޯން މެރޯ ޓްރާންސްޕްލާންޓް އަކީ މީގެ 40 އަހަރު ކުރީއްސުރެން ފެށިގެން ދެވޭ ސްޓެމް ސެލް ތެރަޕީ އެކެވެ.

ހަމައެއާއެކު އާތުރައިޓިސްއާއި ސްޓްރޯކް ފަދަ ބަލިތަކުން ހަށިގަނޑަށް ލިބިފައިވާ ގެއްލުންތައް ރަނގަޅު ކުރަން ވެސް ސްޓެމް ސެލް ފަރުވާ ވަނީ ބޭނުން ކުރެވިފަ އެވެ.

މީގެ އިތުރުން ވެސް މީގެ ކުރިން ފަރުވާއެއް ހޯދިފައިނުވާ ހަކުރުބަލި، ޕާކިންސަންސް އަދި އެއިޑްސް ބައްޔަށް ސްޓެމް ސެލް ތެރަޕީއިން ފަރުވާ ހޯދިދާނެ ކަމުގެ އުއްމީދު ސައިންސްވެރިން ވަނީ ދީފަ އެވެ.

އެހެން ކަމުން ސްޓެމް ސެލް ތެރަޕީއާއެކު ސިއްހީ ބޭސް ފަރުވާގެ މުސްތަގުބަލް އޮތީ ވަރަށް އުޖާލާކޮށް ކަމަށް ބުނުމަކީ ދޮގަކަށް ނުވާނެ އެވެ.