މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެ އެވެ.

ފުލުހުން ބުނީ ގަލޮޅު ގެއެއް ތެރެއިން ހަބަރު ހުސްވެފައި އޮތް މީހަކު އޮތް ކަމުގެ މައުލޫމާތު ރޭ ދަންވަރު 01:27 ހާއިރު ރިޕޯޓު ކޮށްފައިވާ ކަމަށެވެ.

މަރުވެފައި އޮއްވާ ފެނުނީ ގ. ބިއުޓީ ވިލާ، ދާއޫދު ޖިމްރީޒް، 45 އެވެ.

އެ މީހާ އައިޖީއެމްއެޗް ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ހޮސްޕިޓަލާ ހަވާލާދީ ފުލުހުން ބުންޏެވެ.

މަރުވެފައި އޮތް މީހަކު ގެއެއްގެ ތެރެއިން މިއަދު ފެނިފައިވާއިރު، އިއްޔެ ހަވީރު ވެސް ގަލޮޅު ގެއެއް ތެރޭގައި ހަބަރު ހުސްވެފައި އޮތް މީހަކު ފެނިގެން، ހަވީރު 5:02 ހާއިރު ފުލުހުންނަށް ރިޕޯޓު ކޮށްފައިވެ އެވެ.

އިއްޔެ ހަވީރު މަރުވެފައި އޮއްވާ ފެނުނީ ގ. ފްރެސް ލައިޓް، އަލީ ރަޝީދު 35 އެވެ.

ފުލުހުން މި މައްސަލަތަކާއި ގުޅިގެން އިތުރު ތަފްސީލް ހާމައެއް ނުކުރެ އެވެ. މިހާރު ފުލުހުން ދަނީ ދެ މައްސަލަ ވެސް ތަހުގީގު ކުރަމުންނެވެ.