ބޮލީވުޑްގެ ލަވަކިޔުންތެރިޔާ އަބީޖީތު ބަޓާޗާރްޔާ ޝާހްރުކް ޚާންއަށް ލަވަކިޔައިދިނުން ހުއްޓާލި ފަހުން ޝާހްރުކް ޚާންގެ ލަަވަތައް މަޝްހޫރު ނުވާ ކަމަށް އަބީޖީތު ބުނެފި އެވެ.

ސަންޖޭ މިޝްރާގެ ޕޮޑްކާސްޓްގައި ވާހަކަ ދައްކަމުން އަބީޖީތު ވަނީ އޭނާއާއި ޝާހްރުކް ޚާންގެ މެދުގައި ޖެހުނު މައްސަލައަށް އަލިއަޅުވާލާފަ އެވެ. އެގޮތުން ޝާހްރުކް ޚާންއާ މައްސަލަ ޖެހުނު އެހެން ތަރިންނާ ހިލާފަށް ޝާހްރުކް ޚާންއަށް ނިސްބަތްކޮށް އެއްވެސް ކުޑައިމީސް ކަމެއް ކޮށްފައިނުވާނެ ކަމަށް އަބީޖީތު ބުންޏެވެ.

އެއާއެކު އޭނާ ބުނެފައިވަނީ އެ ދެމީހުންގެ މެދުގައި މައްސަލަ ޖެހުނު ފަހުން މިއަދާ ހަމައަށް ވެސް ޝާހްރުކް ޚާން އޭނާއާ ވާހަކަ ދައްކާފައިނުވާ ކަމަށެވެ.

"އަހަންނަކީ އޭނާއަށްވުރެ ދޮށީ މީހެއް. އަހަރެން އޭނާގެ ފަރާތުން ބޭނުންވަނީ މައާފަށް އެދުމެއް ނޫން. އެކަމަކު ވީކަމެއް ވީ ކަމަށް ހަދާފަ ހަނދާން ނައްތާލުމަކީ ވެސް އޮތް ކަމެއް،" އަބީޖީތު ބުންޏެވެ.

ޝާހްރުކް ޚާންއާއި އަބީޖީތުގެ މެދުގައި މައްސަލަ ޖެހިފައިވަނީ 2000ގެ އަހަރުތަކަށްފަހު ޝާހްރުކް ޚާންގެ ފިލްމުތަކުގައި ލަވަކިޔަން އަބީޖީތުއަށް ފުރުސަތު ނުދިނުމުން ކަމަށް ބެލެވެ އެވެ.

އެހެން ނަމަވެސް މާޒީގައި އަބީޖީތު ވަނީ ޝާހްރުކް ޚާންއަށް މަޝްހޫރު ލަވަތަކެއް ކިޔައިދީފަ އެވެ. އޭގެ ތެރޭގައި "ތުމްހެ ޖޮ މޭނެ ދޭކާ"، (މޭ ހޫ ނާ، 2004) އަދި "ޗާންދް ތާރޭ"، (ޔެސް ބޮސް، 1999) ހިމެނެ އެވެ.