ހޮލީވުޑްގެ ތަރި ޖަސްޓިން ބެލްޑޯނީއަށް ކުރެވިފައިވާ ޖިންސީ ފުރައްސާރައިގެ ތުހުމަތުތަކާ ގުޅިގެން އޭނާއަށް ލިބިފައިވާ އެވޯޑައް ވެސް އަތުލަން ފަށައިފި އެވެ.

އެ މައްސަލައާ ގުޅިގެން، އަންހެނުންގެ ހައްގުތަކަށް މަސައްކަތްކުރާ ޖަމިއްޔާއަކުން ވަނީ ޖަސްޓިންއަށް އަރުވާފައިވާ "އަންހެނުންގެ ހައްގުތަކަށް ވަކާލާތު ކުރުމުގެ އެވޯޑު" މިހާރު އޭނާގެ ކިބައިން އަތުލާފަ އެވެ.

އެ ޖަމިއްޔާއިން ބުނެފައި ވަނީ ޖަސްޓިންގެ އެވޯޑު އަނބުރާ ގެންނަން ޖެހުނީ އޭނާއަށް ކުރެވިފައިވާ ތުހުމަތުތަކަކީ އެ އެވޯޑުގެ ޝަރަފަށް ކުޑައިމީސްކަން ގެނުވާ ތުހުމަތުތަކަށް ވާތީ ކަމަށެވެ.

އެހެން ކަމުން އެ އެވޯޑު އަނބުރާ ގެނެވިފައިވާކަން މިހާރު ޖަސްޓިންއަށް އަންގާފައިވާނެ ކަމަށް ވެސް އެ ޖަމިއްޔާގެ ސޯޝަލް މީޑިއާ ޕޯސްޓުގައިވެ އެވެ.

ޑިސެމްބަރު މަހު ނުވަވަނަ ދުވަހު ޖަސްޓިންއަށް ލިބުނު އެ އެވޯޑު އަތުލާފައިވަނީ އޭނާގެ "އިޓް އެންޑްސް ވިތު އަސް"ގެ ކޯސްޓާރު ބްލޭކް ލައިވްލީ އޭނާގެ މައްޗަށް ޖިންސީ ފުރައްސާރައިގެ ތުހުމަތު ކުރިތާ ކުޑަ ދުވަސްކޮޅެއްގެ ތެރޭގަ އެވެ.

ބްލޭކްގެ އަބުރަށް އަރައިގަތުމާއި ޖިންސީ ފުރައްސާރައިގެ ތުހުމަތުތައް ޖަސްޓިންއަށް ކުރެވުނު ފަހުން އޭނާއަށް އަންނަނީ އާއްމުންގެ ނުރުހުން އަމާޒުވަމުންނެވެ.