އިސްކޮޅުން ކުރުވުމުން ބޮލީވުޑަށް ތައާރަފްވި ދުވަސްވަރު އަމިއްލަ ނަފްސާމެދު ސުވާލު ކުރެވުނު ކަމަށް ބޮލީވުޑްގެ ކާމިޔާބު ތަރި އާމިރު ޚާން ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި އާމިރު ބުނެފައިވަނީ 80ގެ ފަހުކޮޅު އޭނާގެ އެންމެ ފުރަތަމަ ފިލްމުގެ މަސައްކަތުގައި އުޅުނުއިރު އޭނާގެ އިސްކޮޅާމެދު ކަންބޮޑުވި ކަމަށެވެ. އެގޮތުން އިސްކޮޅުން ކުރުވުމުގެ ސަބަބުން ބެލުންތެރިން އޭނާ ބަލައިނުގަންނާނެ ކަމުގެ އިހުސާސެއް އޭރު ކުރެވުނު ކަމަށް އާމިރު ބުންޏެވެ.

"ފަހުން އަހަންނަށް ވިސްނުނު އެއީ (އިސްކޮޅަކީ) އެހާ މުހިއްމު ކަމެއް ނޫންކަން. އެކަމަކު ކޮންމެވެސް ވަރަކަށް ކަންބޮޑުވުން ވެސް އޮވޭ،" އާމިރު ބުންޏެވެ.

މިއީ އާމިރު އޭނާގެ އިސްކޮޅާ ބެހޭގޮތުން ވާހަކަދެއްކި ފުރަތަމަ ފަހަރެއް ނޫނެވެ. 2012 ވަނަ އަހަރު ނުކުތް އޭނާގެ ފިލްމު "ތަލާޝް"ގެ ޕްރޮމޯޝަންތަކުގެ ތެރެއިން އާމިރު ވަނީ އޭނާގެ އިސްކޮޅުގެ ސަބަބުން މީހުން ފުރައްސާރަކުރި ކަމަށް ވެސް ބުނެފަ އެވެ.

އިސްކޮޅުގައި ފަސް ފޫޓު ފަސް އިންޗި ހުންނަ އާމިރުއަކީ ބޮލީވުޑްގައި ހަރަކާތްތެރިވާ އެހެން ފިރިހެން އެކްޓަރުންނަށްވުރެ ކުރު އެކްޓަރެކެވެ.