މިމަހުގެ ކުރީކޮޅު އިންޑިއާގެ ހައިދަރްއާބާދުގެ ސިނަމާއެއްގައި ތޮއްޖެެހިގެން މީހަކު މަރުވި މައްސަލާގައި ހައިދަރްއާބާދުގެ ފުލުހުން އެކްޓަރު އައްލޫ އަރުޖުންއާ ސުވާލު ކޮށްފި އެވެ.

މިދިޔަ އަންގާރަ ދުވަހު ކުރިއަށްދިޔަ އެ ތަހުގީގު ސެޝަން ހަތަރު ގަޑިއިރަށް ދެމިގެންދިޔައިރު އައްލޫއާއެކު އޭނާގެ ބައްޕައާއި ބަފާބެ އެ ސެޝަންގައި ބައިވެރިވި އެވެ.

ހަބަރުތައް ބުނާ ގޮތުގައި ފުލުހުން އައްލޫއާ ވިއްސަކަށް ސުވާލު ކުރިނަމަވެސް އައްލޫ ޖަވާބު ދީފައިވަނީ އޭގެ ތެރެއިން މަދު ސުވާލަކަށެވެ.

ޑިސެމްބަރު މަހުގެ ހަތަރުވަނަ ދުވަހު އައްލޫގެ ފިފްމު ފުޝްޕާ 2 ޕްރިމިއާ ކުރަން ހައިދަރުއާބާދުގެ ސަންދްޔާ ތިއޭޓަރުގައި ބޭއްވި ހަފްލާގައި ހިނގި އެ ހާދިސާގައި 35 އަހަރުގެ އަންހެނަކު މަރުވެފައިވާއިރު އޭނާގެ ދަރިފުޅަށް ވަނީ އެކިވަރުގެ އަނިޔާ ލިބިފަ އެވެ.

އެ ހާދިސާ ހިނގިތާ 8 ދުވަސް ފަހުން އައްލޫ ހައްޔަރު ކުރެވުނު ނަމަވެސް ތެލަންގަނާ ހައިކޯޓުން ވަނީ ކަފާލާތުގެ ދަށުން އޭނާ ދޫކޮށްލާފަ އެވެ.

އެ ހިތާމަވެރި ހާދިސާ ހިނގާފައިވަނީ ފުލުހުންގެ ހުއްދައަކާނުލާ އައްލޫ އެ ދުވަހު އެތަނަށް ދިޔުމުން ކަމަށް ބުނެ ގިނަ ބަޔަކު އަންނަނީ އޭނާއަށް ފާޑުވެސް ކިޔަމުންނެވެ.