ގިނަ ބައެއްގެ މަގުބޫލުކަން ހޯދި ވާހަކަ ހެރީ ޕޮޓާގެ ލިޔުންތެރިޔާ ޖޭކޭ ރޯލިންއާއި އެ ވާހަކައަށް ބިނާކޮށް ހެދި ފިލްމު "ހެރީ ޕޮޓާ"ގެ ލީޑު ތަރިން ކަމަށްވާ އެމާ ވަޓްސަންއާއި ޑެނިއަލް ރެޑްކްލިފްއަކީ އެއްއިރެއްގައި ވަރަށް ގާތް ތިން މީހުންނެވެ.

އެހެން ނަމަވެސް ފާއިތުވެ ދިޔަ އަހަރުތަކުގައި އެމީހުންގެ ގުޅުން ހީނަރުވެ އެމާއާއި ޑެނިއަލްއަށް ދުވަހަކު ވެސް މައާފު ނުކުރާނެ ކަމަށް ރޯލިން ވަނީ ބުނެފަ އެވެ.

"ހެރީ ޕޮޓާ"ގެ ތަރިންނާއި ރޯލިންގެ މެދުގައި މައްސަލަތައް ޖެހެން ފެށީ އިނގިރޭސި ވިލާތުގައި އެއް ޖިންސުން ގުޅުން ހިންގުމުގެ ހައްގުތަކާ ބެހޭގޮތުން ރޯލިން ދެއްކި ވާހަކަތަކެއްގެ ސަބަބުންނެވެ.

2020 ވަނަ އަހަރު ޓްރާންސްޖެންޑާ ކޮމިއުނިޓީއާ ބެހޭގޮތުން ރޯލިން ބުނެފައިވަނީ އެފަދަ މީހުންނަކީ އެތައް ގަރުނެއްގެ މަސައްކަތުން އަންހެނުންނަށް ލިބިފައިވާ މިނިވަން ހައްގުތަކަށް ބުރޫ އަރުވާ ބައެއް ކަމަށެވެ.

ރޯލިންގެ އެ ކޮމެންޓާއެކު އެއް ޖިންސުން ގުޅުން ހިންގުމުގެ ހައްގަށް ވަކާލާތުކުރާ މީހުންގެ ފާޑުކިޔުން އޭނާއަށް އަމާޒުވި އެވެ. އޭގެ ތެރޭގައި ޑެނިއަލްއާއި އެމާ ވެސް ހިމެނެ އެވެ.

އެމާއާއި ޑެނިއަލް ވަކިވަކިން ނެރުނު ބަޔާނެއްގައި ބުނެފައިވަނީ "ހެރީ ޕޮޓާ"ގެ ކްރޫއަކީ އެއްވެސް ބައެއްގެ އަމިއްލަވަންތަކަމަށް ހުރަސްއަޅާ ބައެއް ނޫން ކަމަށާއި އެހެން ކަމުން ރޯލިންގެ ފަރާތުން މައާފަށް އެދޭ ކަމަށެވެ.

އެއަށްފަހު ފާއިތުވި އަހަރުތަކުގެ ތެރޭގައި އެކި ފަހަރު މަތިން އެ ތަރިން އެކަކު އަނެކަކަށް ބަހުގެ ހަމަލާތައް ބަދަލުކޮށްފައިވާއިރު ޖޭކޭ ވަނީ އޭނާގެ ހިޔާލަށް އިހުތިރާމް ކުޑަކުރުމުން އެމާއާއި ޑެނިއަލްއަށް މައާފު ނުކުރާނެ ކަމަށް ބުނެފަ އެވެ.

ރޯލިންގް އެ ބީދައިން ވާހަކަ ދައްކާފައިވަނީ ޓްރާންސް ކޮމިއުނިޓީއާ ދެކޮޅަށް އޭނާ ފާޅުކުރާ ހިޔާލުތަކުގެ ސަބަބުން ގާނޫނީ ފިޔަވަޅު އަޅާފާނެ ކަމުގެ ބިރު އޮތް ދަނޑިވަޅެއްގަ އެވެ.