ބަލްގޭރިއާއަށް ނިސްބަތްވާ ފާދިރީއެއް ކަމަށްވާ ބާބާ ވަންގާއަކީ މުސްތަގުބަލުގައި ވާނެ ކަންތައްތައް ފެންނަ ކަމަށް ދައުވާކުރި މީހެކެވެ. 1996 ވަނަ އަހަރު މަރުވި ވަންގާ ވަނީ މަރުވުމުގެ ކުރިން މީލާދީން 5000 ވަނަ އަހަރާ ހަމައަށް ދުނިޔޭގައި ހިނގާނެ ކަމަށް ބުނާ ކަންތައްތަކެއް ކިޔައިދީފަ އެވެ. އެގޮތުން 2024 ވަނަ އަހަރަށް ވެސް ބައެއް ކަންތައްތައް ލަފާކޮށްފައިވާއިރު އޭގެ ތެރެއިން ބައެއް ކަންކަން މިހާރު ވަނީ ހަގީގަތަކަށްވެފަ އެވެ.

އިގްތިސާދީ އަޑިގަނޑެއް

2020ގެ އަހަރުތަކަށް ބާބާ ވަންގާ ލަފާކުރި އެއް ކަމަކީ މުޅި ދުނިޔެ އިގުތިސާދީ އަޑިގަނޑަކަށް މިސްރާބު ޖެހުމެވެ. 2025 ވަނަ އަހަރާ ކުރިމަތިލާއިރު މުޅި ދުނިޔޭގެ އިގްތިސާދު މިވަނީ ހީނަރުވެފަ އެވެ. ބާބާ ވަންގާ ބުނި ގޮތުގައި މި އަޑިގަނޑަކީ ގައުމުތަކުގެ މެދުގައި އުފެދޭ ސިޔާސީ ނުތަނަވަސްކަމެއްގެ ސަބަބުން މަގުފަހިވާ އަޑިގަނޑެކެވެ.

ތިމާވެށްޓަށް އިތުރު ނުރައްކަލެއް

2024 ވަނަ އަހަރަށް ބާބާ ވަންގާ ލަފާކުރި އަނެއް ކަމަކީ މޫސުމަށް އަންނަ ބަދަލުތަކުގެ ސަބަބުން ތިމާވެށްޓަށް ކުރިމަތިވާނެ ނުރައްކާތަކެވެ. ސައިންސްވެރިންގެ ރިޕޯޓުތަކުން ދައްކާ ގޮތުގައި މި ނިމޭ އަހަރަކީ ދުނިޔޭގައި މިހާތަނަށް ރެކޯޑު ކުރެވުނު އެންމެ ހޫނުގަދަ އަހަރެވެ.

ސިއްހީ އިންގިލާބެއް

2024 ވަނަ އަހަރު ނިމޭއިރު ސިއްހީ ދާއިރާއަށް ބޮޑު އިންގިލާބެއް އަންނާނެ ކަމަށް ބާބާ ވަންގާ ލަފާކުރި އެވެ. އެގޮތުން ސައިންސްވެރިން ވަނީ ވަރަށް ފަހުން ކެންސަރަށް އާ ފަރުވާއެއް ހޯދާފަ އެވެ. ހަބަރުތައް ބުނާ ގޮތުގައި މިއީ ކެންސަރަށް އޮތް މުޖައްރިބު ފަރުވާ އެކެވެ.

ކޮންމެއަކަސް މީގެ ތިރީހަކަށް އަހަރު ކުރިން ވަންގާ ލަފާކުރި ބައެއް ކަންކަން މިވަނީ ހަގީގަތަކަށްވެފަ އެވެ. އެހެން ނަމަވެސް މުސްލިމުންގެ ގޮތުގައި އަހަރުމެން ގަބޫލު ކުރަން ޖެހޭ ކަމަކީ މިއީ ހަމައެކަނި އިއްތިފާގެއް ކަމެވެ. މުސްތަގުބަލުގައި ވާންހުރި ކަންކަމަކީ ހަމައެކަނި މާތްރަސްކަނލާގެ ދެނެވޮޑިގެންވާ ކަންކަން ކަމެވެ.