މަޝްހޫރު އިންޓަނެޓް ޝަހްސިއްޔަތެއް ކަމަށްވާ ކައިލީ ޖެނާއާއި ހޮލީވުޑްގެ އެކްޓަރު ޓިމޮތީ ޗަލަމެޓްގެ ލޯބީގެ ވާހަކަ މީޑިއާގައި ދެކެވޭތާ ދުވަސްތަކެއް ވެއްޖެ އެވެ.

އެ ދެމީހުންކުރެ އެކަކު ވެސް އެކަން މީޑިއާއަށް ސީދާ ގޮތެއްގައި ޔަގީންކޮށް ނުދިން ނަމަވެސް އެމީހުންގެ ސޯޝަލް މީޑިއާ ޕޯސްޓުތަކުންނާއި އެކުގައި ފެންނަ ފެނިލުންތަކުން އެކަން ހާމަވެ އެވެ.

އެގޮތުން ފިލްމީ ދާއިރާގެ ބައެއް ކަންކަމުގައި ޓިމޮތީއަށް ކައިލީގެ އެހީތެރިކަން ވެސް ލިބެމުންދާ ކަމަށް ހޮލީވުޑްގެ ބައެއް ރިޕޯޓުތަކުން ބުނެފައިވެ އެވެ.

ދާދި ފަހުން ބޭއްވި 36 ވަނަ އެނުއަލް ޕާމް ސްޕްރިންގްސް އިންޓަނޭޝަނަލް ފިލްމް ސޮސައިޓީ ފިލްމު އެވޯޑްސްގައި ބައިވެރިވި ޓިމޮތީއަށް ވަނީ އޭނާއާއި ކައިލީގެ ގުޅުމާ ބެހޭގޮތުން ސުވާލު ކުރެވިފަ އެވެ.

އެގޮތުން ފިލްމީ ކަންކަމުގައި ކައިލީގެ އެހީތެރިކަން ލިބުމުން ކުރެވެނީ ކޮންކަހަލަ އިހުސާސް ތަކެއްތޯ ސުވާލު ކުރެވެމުން ޓިމޮތީ ވަނީ އެ ސުވާލަށް ސީދާ ޖަވާބެއް ނުދީ އޮޅުވާލާފަ އެވެ.

އޭނާ ބުނީ އޭނާދެކެ ލޯބިވާ މީހުން އުޅޭ ތަނެއްގައި ހުރުމަކީ އަބަދުވެސް ލިބޭ އުފަލެއް ކަމަށާއި އެއީ އޭނާއަށް ލިބޭ ފަހުރެއް ކަމަށެވެ.

ކައިލީއާއި ޓިމޮތީ ލޯބީގެ ގޮތުން ގުޅިގެން އުޅޭ ކަމަށް އެންމެ ފުރަތަމަ އަޑު އަރާފައިވަނީ 2023 ވަނަ އަހަރުގެ ތެރޭގަ އެވެ. އޭގެ ފަހުން އެކި ފަހަރު މަތިން އެ ދެތަރިން އެކުގައި ފެނިފައިވެ އެވެ.