އިންޑިއާގެ ލައިން އޮފް ކްރެޑިޓްގެ ދަށުން އެމްޑީޕީގެ ސަރުކާރުން ގދ. ހޯނޑެއްދޫގައި ގާއިމްކުރި ފެނާއި ނަރުދަމާ ނިޒާމު ރައީސް މުހައްމަދު މުއިއްޒު މިއަދު އިފްތިތާހުކޮށްދެއްވައިފި އެވެ.

އެ ރަށުގައި މި ދެ ހިދުމަތް ފައްޓަވައިދެއްވީ ރައީސް މުއިއްޒު ދެކުނުގެ ރަށްތަކަށް މިއަދު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

އިންޑިއާގެ އެގްޒިމް ބޭންކުގެ ލޯނުގެ ދަށުން ހޯޑެއްދޫގައި ފެނާއި ނަރުދަމާ ގާއިމްކުރަން ކުރީގެ ސަރުކާރުން ހަވާލުކޮށްފައިވަނީ ޓްރެވެނީ އިންޖީނިއަރިން އެންޑް އިންޑަސްޓްރީސް ލިމިޓެޑް ކިޔާ ކުންފުންޏަކާ އެވެ.

ހޯނޑެއްދޫގައި ނަރުދަމާގެ ފަސް ޕަމްޕު ސްޓޭޝަން ގާއިމްކުރުމާއި ސީ އައުޓް ފޯލް އެޅުމާއި މުޅި ރަށުގައި ފެނާއި ނަރުދަމާ ނިޒާމުގެ ވިއުގަ އެޅުމާއި ދުވާލަކު 75 ޓަނުގެ ފެން އުފެއްދޭ ވަރުގެ ދެ އާރުއޯ ޕްލާންޓު ބަހައްޓާފައިވެ އެވެ.

މި ޕްރޮޖެކްޓްގެ ދަށުން ފެން ރައްކާކުރުމަށް ދެ ޓޭންކު ބަހައްޓައި ގޭގެއަށް ފެނާއި ނަރުދަމާގެ ކަނެކްޝަން ގުޅާފައިވެ އެވެ.