ގޮތްނޭނގޭގޮތަށް މަރުވެފައި އޮތް މީހަކު މާލެއިން އަނެއްކާވެސް ފެނިއްޖެ އެވެ.

ފާއިތުވި މަހެއްހާ ދުވަހު މިފަދަ އިތުރު ހަތަރު މަރުގެ މައްސަލައެއް ރާއްޖޭގައި ފެންމަތިވެފައިވެ އެވެ.

ފުލުހުންގެ މީޑިއާ އޮފިޝަލް ވިދާޅުވީ މ. ތަރިވިލާގޭ ހުސައިން އަހުމަދު، 41، މަރުވެފައި އޮއްވާ މިއަދު ފެނިފައިވާ ކަމަށެވެ. އޭނާ މަރުވެފައި އޮއްވައި ފެނުނީ އެ ގޭގެ ތެރެއިން ކަމަށް ވެސް އޮފިޝަލް ވިދާޅުވި އެވެ.

އޭނާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް ފޮނުވަން މިހާރު ވަނީ ނިންމާފަ އެވެ.

"ފުލުހުން އަންނަނީ މި މައްސަލަ ތަހުގީގު ކުރަމުން. ވަރަށް އަވަހަށް ޕޯސްޓްމޯޓަމް ހަދަން ފޮނުވޭނެ،" އޮފިޝަލް ވިދާޅުވި އެވެ.

ގޮތްނޭނގޭ ގޮތަށް މަރުވެފައި އޮތް މީހަކު މިފަހުން އެންމެ ފުރަތަމަ ފެނުނީ މިދިޔަ މަހުގެ 22 ވަނަ ދުވަހު އެވެ. އެ ދުވަހު މަރުވެފައި އޮއްވައި ގަލޮޅު ގެއެއްގެ ތެރެެއިން ފެނުނީ އުމުރުން 45 އަހަރުގެ މީހެކެވެ.

މިދިޔަ ޑިސެމްބަރު 21 ވަނަ ދުވަހު ވެސް ގަލޮޅުގެ ގެއެއްގެ ތެރެއިން 35 އަހަރުގެ މީހަކު މަރުވެފައި އޮއްވައި ފެނިފައިވެ އެވެ. އަދި ޑިސެމްބަރު ހަތް ވަނަ ދުވަހު ގއ. ދާންދޫ މަގުމަތިން އުމުރުން 33 އަހަރުގެ ޒުވާނަކު މަރުވެފައި އޮއްވާ ފެނިފައިވެ އެވެ.

މީގެއިތުރުން މިދިޔަ ޑިސެމްބަރު މަހުގެ ތެރޭގައި ހުޅުމާލޭ ފަޅުތެރެއިން ވެސް މަރުވެފައި އޮތް 36 އަހަރުގެ މީހަކު ފެނިފައިވެ އެވެ.