ބޮލީވުޑްގެ ތަރި ރިތިކް ރޯޝަން އެ ދާއިރާއަށް ތައާރަފްވިތާ 25 އަހަރު ފުރެން ގާތްވެފައިވާއިރު އޭނާއަކީ މިވަގުތު ބޮލީވުޑްގެ އެންމެ އިސް ސަފުގައި ގުނާލެވޭ ތަރި އެކެވެ.

2000 ވަނަ އަހަރުގެ ޖެނުއަރީ މަހުގެ 14 ވަނަ ދުވަހު ރިލީޒް ކުރެވުނު "ކަހޯނާ ޕްޔާރުހޭ"އިން ބޮލީވުޑަށް ތައާރަފްވި ރިތިކްއަށް މާދަމާ 51 އަހަރު ފުރޭނެ އެވެ.

ފާއިތުވި 25 އަހަރު ދުވަހުގެ ތެރޭގައި ރިތިކް ވަނީ ތަފާތު ޖޯންރާތަކުގެ ގިނަ ފިލްމުތަކެއް ކުޅެދީފަ އެވެ. ލޯބީގެ ފިލްމުތަކާއި އެކްޝަން ފިލްމުތަކުގެ އިތުރުން ސުޕަނެޗުރަލް ފިލްމުތަކުން ވެސް އޭނާ ފެނިފައިވެ އެވެ.

އެގޮތުން "ކަހޯނާ ޕްޔާރުހޭ"ގެ އިތުރުން "ކަބީ ޚުޝީ ކަބީ ގަމް"، "ކޮއި މިލް ގަޔާ"، "ވޯ"، "ކާބިލް" އަދި "ކްރިޝް"ގެ ފިލްމުތަކަކީ އޭނާގެ ފާހަގަކޮށްލެވޭ ބައެއް ފިލްމުތަކެވެ.

މިދިޔަ އަންގާރަ ދުވަހު އިންޑިއާގެ މީޑިއާއާއެކު ބޭއްވި ބައްދަލުވުމެއްގައި ރިތިކް ވަނީ ބޮލީވުޑްގައި އޭނާ ހޭދަކުރި 25 އަހަރާ ބެހޭގޮތުން ވާހަކަ ދައްކާފަ އެވެ.

ރިތިކް ބުނީ މީޑިއާގެ ސަބަބުން އޭނާއަކީ ކުރިއަށްވުރެ ޒިންމާދާރު މީހަކަށްވި ކަމަށާއި އެކަމަށްޓަކައި ޝުކުރު އަދާކުރާ ކަމަށެވެ. އެއާއެކު އޭނާ ވަނީ ބެލުންތެރިންނަށް ވެސް ޝުކުރު އަދާކޮށްފަ އެވެ.

"މީގެ 25 އަހަރު ކުރީގެ ހަނދާންތައް އަދިވެސް އެބަހުރި. އަހަރެން ހުރީ ވަރަށް ހާސްވެ ބޭރަށް ވެސް ނުކުންނަން ވަރަށް ލަދުން" ރިތިކް ބުނެފަ އެވެ.

ރިތިކް ބޮލީވުޑަށް ނުކުތްތާ 25 އަހަރު ވާއިރު އޭނާގެ އުފަންދުވަހުގެ މުނާސަބަތުގައި އޭނާގެ އެންމެ ފުރަތަމަ ފިލްމު އަލުން ސިނަމާތަކުގައި އަޅުވަން ވަނީ ނިންމާފަ އެވެ.