ކުރިއަށް އޮތް ފަސް އަހަރު ތެރޭގައި މީހަކާ ކައިވެނި ކުރަން އުއްމީދުކުރާ ކަމަށް ބޮލީވުޑްގެ ޒުވާން ތަރި އަނަންޔާ ޕާންޑޭ ބުނެފި އެވެ.

ފޯބްސް އިންޑިއާއަށް ދިން އިންޓަވިއުއެއްގައި އަނަންޔާ ވަނީ ކުރިއަށް އޮތް ފަސް އަހަރަށް ރާވަފައިވާ އޭނާގެ ދިރިއުޅުމުގެ "ޕްލޭން" ހިއްސާކޮށްފަ އެވެ.

އަނަންޔާ ބުނީ ކުރިއަށް އޮތް ފަސް އަހަރު ތެރޭގައި މީހަކާ ކައިވެނިކޮށް އާއިލާއެއް ބިނާކުރުމުގައި އުޅޭ މަންޒަރު އޭނާއަށް ފެންނަ ކަމަށެވެ.

އޭގެ އިތުރުން ފިލްމީ މަސައްކަތްތަކުގައި ވެސް ބޮލީވުޑްގެ އެންމެ ކުރީގައި ގުނާލެވޭ އެކްޓަރަކަށް ވާނެ ކަމަށް އަނަންޔާ ބުނެފައިވެ އެވެ.

"އެހާއިރަށް އަހަރެން މި މަސައްކަތް ކުރަނީ މަސައްކަތުގައި ގަދައަޅާ މަސައްކަތްކޮށް އަހަރެންގެ ހުނަރުތައް ކުރިއަރުވަން" އަނަންޔާ ބުންޏެވެ.

އަނަންޔާ އޭނާގެ ކައިވެނީގެ ވާހަކަ ދައްކާފައި މިވަނީ ކުރީގެ މޮޑެލްއެއް ކަމަށްވާ ވޯކާ ބްލޭންކޯއާ އަނަންޔާ ރައްޓެހިވެގެން އުޅޭ ކަމަށް ހަބަރު ފެތުރިފައި ވަނިކޮށެވެ.

އެ ދެމީހުން ވަނީ މިދިޔަ އަހަރު އޮތް އާނަންތު އަމްބާނީގެ ކައިވެންޏަށް އެކުގައި ގޮސްފަ އެވެ. އެ ހަފްލާގެ ތެރެއިން އެ ދެމީހުން އެކުގައި ގިނަ ވަގުތުތަކެއް ހޭދަކުރި ކަމަށް ބުނެވެ އެވެ.