މުޅި ދުނިޔެ އިއްޔެ ސިއްސުވާލި އެއް ހަބަރަކީ ހޮލީވުޑް ހިލްސްގައި ނުރައްކާތެރި އަލިފާނުގެ ހާދިސާއެއް ހިނގައި އެތައް ގެއްލުމެއް ލިބުނު ހަބަރެވެ. އެ އަލިފާނުގައި އެތައް ބައެއްގެ ގެދޮރު ގެއްލިފައިވާއިރު އޭގެ ތެރޭގައި ހޮލީވުޑްގެ މަޝްހޫރު ބައެއް ތަރިން ވެސް ހިމެނެ އެވެ.

އެނާ ފަރިސް

ސީބީއެސްގެ ސިޓްކޮމް "މޮމް"އިން މަގުބޫލުކަން ހޯދި އެނާގެ ހުންނަނީ ލޮސް އެންޖެލަސްގެ އަވަށެއް ކަމަށްވާ ޕެސިފިކް ޕެލިސޭޑްސްގަ އެވެ. ހަބަރުތައް ބުނާ ގޮތުގައި އަލިފާނުގައި އެނާގެ ގެ ހުންނަ ކޮށި އެއްކޮށް އަނދައި އަޅިއަށްވި އެވެ.

ޕެރިސް ހިލްޓަން

ކާމިޔާބު ތަރި ޕެރިސް ހިލްޓަންގެ ގެ ހުންނަ މަލިބޫއަކީ އަލިފާންގަނޑު އެންމެ ގަދައަށް ފެތުރުނު ސަރަހައްދެވެ. ޕެރިސް ވަނީ އަލިފާނުގެ ހާދިސާގައި އޭނާގެ ގެ އަނދާ އަޅިއަށްވިކަން ޔަގީންކޮށްދީފަ އެވެ.

މާކް ހެމިލް

ސްޓާ ވޯސްގެ ފިލްމުތަކުން ލޫކް ސްކައިވޯކާގެ ގޮތުގައި އާއްމުންގެ މަގުބޫލުކަން ހޯދާފައިވާ މާކް ވެސް ވަނީ މަލިބޫގައި ހުންނަ އޭނާގެ ގެ ހުސްކޮށްފައިވާކަން ރޭ ސޯޝަލް މީޑިއާ މެދުވެރިކޮށް އިއުލާން ކޮށްފަ އެވެ.

މޭންޑީ މޯ

"ދިސް އިޒް އަސް"ގެ ތަރި މޭންޑީ މޯއަށް ވަނީ އޭނާގެ ދަރިންނާއި އޮޅު ޖަނަވާރުންނާއެކު އޭނާގެ ގެ ދޫކޮށް ރައްކާތެރި ހިސާބަކަށް ދާން ޖެހިފަ އެވެ.

ރީސް ވިތަސްޕޫން

މަޝްހޫރު ސިޓްކޮމް "ފްރެންޑްސް"ގެ ތަރި ރީސްގެ ގެ ވެސް ހުންނަނީ އަލިފާންގަނޑު ފެތުރެމުން ދިޔަ ސަރަހައްދުގަ އެވެ. އެހެން ކަމުން އޭނާގެ ގެ ވެސް ވަނީ ސަލާމަތީ ސަބަބުތަކަށްޓަކައި ހުސްކުރެވިފަ އެވެ.