ހަކުރު ގިނަ ބުއިންތަކުން އުމުރު ކުރުވާ ކަމަށް އެމެރިކާގެ ޓަފްޓްސް ޔުނިވާސިޓީގެ މެޑިސިން އިންސްޓިޓުއުޓުން ހެދި ދިރާސާއަކުން ހާމަވެއްޖެ އެވެ.

ދާދި ފަހުން ހެދި އެ ދިރާސާއިން އެނގުނު ގޮތުގައި ގިނައިން ހަކުރު އެކުލެވޭ ބުއިންތައް ބޯނަމަ ހަކުރު ބައްޔާއި ހިތުގެ ބަލިތައް ޖެހުމުގެ ފުރުސަތު ދެގުނައަށް އިތުރުވެ އެވެ.

މި ބަލިތަކަކީ ޒުވާން އުމުރުގައި ވެސް ފުރާނައަށް ނުރައްކާ ކުރުމުގެ ފުރުސަތު އޮތް ބަލިތަކެއް ކަމަށް އެ ދިރާސާގައި ބުނެފައިވެ އެވެ.

އެފަދަ ބުއިންތަކުގެ ތެރޭގައި މިހާރު ބާޒާރުގައި އާއްމުކޮށް ވިއްކަން ހުންނަ އެނާޖީ ބުއިންތަކާއި ފިޒީ ބުއިންތައް ވެސް ހިމެނެ އެވެ.

އެ ދިރާސާގައި ހާމަކޮށްފައިވާ ތަފާސް ހިސާބުތަކުން ދައްކާ ގޮތުގައި ކޮންމެ އަހަރަކު ވެސް 330،000އަށްވުރެ ގިނަ މީހުން މިފަދަ ބުއިންތައް ބުއިމުގެ ސަަބަބުން މަރުވެ އެވެ.

"މިއީ ސިއްހީ ކުއްލި ނުރައްކަލެއް. މިކަމަށް ވަގުތުން ހައްލެއް ހޯދަން ޖެހޭ" އެ ދިރާސާގައި އިސްކޮށް އުޅުއްވި ކާޑިއޮލޮޖސްޓެއް ކަމަށްވާ ޑރ. ދަރިއުޝް މުޒައްފަރިން ވިދާޅުވި އެވެ.

އެހެން ކަމުން އެފަދަ ބުއިންތަކުގެ ބަދަލުގައި ހަކުރު ނާޅައި ގުދުރަތީ މޭވާތަކުން ހަދާފައިވާ ބުއިންތައް ބޯން ސައިންސްވެރިން ލަފާދެ އެވެ.