ބޮލީވުޑްގެ ކާމިޔާބު އެކްޓަރެއް ކަމަށްވާ އާމިރު ޚާން ދުންފަތުގެ އިސްތިއުމާލު ކުރުން ހުއްޓާލިކަން މިފަހުން އާއްމުކޮށް އިއުލާން ކޮށްފި އެވެ.

އާމިރުގެ ދަރިފުޅު ޖުނައިދު ޚާންގެ ފިލްމު "ލަވްޔައްޕާ"ގެ ޓްރެއިލާ ލޯންޗުގައި ވާހަކަ ދައްކަމުން އާމިރު ބުނީ ދުންފަތުގެ އިސްތިއުމާލު ކުރުމަކީ އޭނާ ވަރަށް ކުރާހިތްވާ ކަމެއް ކަމަށާއި އެހެން ނަމަވެސް މިހާރު އެކަން ހުއްޓާލާފައިވާ ކަމަށެވެ.

"އެއީ އަހަރެން ދެވި ހިފާފައި ހުރި ކަމެއް. ވަރަށް ކުރާހިތްވާ ކަމެއް. ދޮގު ހަދާކަށް ނެތިން. އެކަމަކު މިހާރު އެކަން ދޫކޮށްލައިފިން" އާމިރު ބުންޏެވެ.

އާމިރު އިތުރަށް ބުނީ އޭނާ ދުންފަތުގެ އިސްތިއުމާލު ކުރުން ހުއްޓާލީ އޭނާގެ ދަރިފުޅު ޖުނައިދު އަށްޓަކައި ވީ ގުރުބާނީއެއްގެ ގޮތުގައި ކަމަށެވެ.

އެގޮތުން ޖުނައިދުގެ ފިލްމު ކާމިޔާބު ވިޔަސް ނުވަތަ ނުވިޔަސް ދުންފަތުގެ އިސްތިއުމާލު ކުރުން ހުއްޓާލަން އޭނާ އަޒުމު ކަނޑައެޅި ކަމަށް އާމިރު ބުންޏެވެ.

އާމިރު ވަނީ ދުންފަތުގެ އިސްތިއުމާލު ކުރުމަކީ ގޯސް ކަމެއް ކަމަށް ބުނެ އެކަން ކުރާ މީހުން އެކަން ހުއްޓާލަން ވެސް ނަސޭހަތްތެރިވެފަ އެވެ.