ގިނަ ބައެއްގެ މަގުބޫލުކަން ހޯދާފައިވާ ބޮލީވުޑްގެ މަޝްހޫރު އެކްޓަރު ކާތިކް އާރްޔަން އިންޖީނިއަރިންގެ ދާއިރާއިން ޑިގްރީ ހާސިލްކޮށްފި އެވެ.

މުމްބާއީގެ ޑީވައި ޕަޓިލް ޔުނިވާސިޓީއިން ކާތިކް ދަސްވެނިވެފައިވަނީ ދާދި ފަހުން އެކަމަށްޓަކައި އެ ޔުނިވާސިޓީގައި ބޭއްވި ހަފްލާއެއްގަ އެވެ.

މިދިޔަ ހޮނިހިރު ދުވަހު އެ ހަފްލާގެ ތެރެއިން ނަގާފައިވާ ވީޑިއޯއެއް އޭނާގެ އިންސްޓަގްރާމް ސްޓޯރީގައި ހިއްސާ ކުރަމުން ކާތިކް ބުނެފައިވަނީ މިއީ "އަނބުރާ ގެއަށް އައުން" ފަދަ އިހުސާސެއް ކަމަށެވެ.

އެ ވީޑިއޯގައި ދަސްވެނިވުމުގެ ހަފްލާގައި ކާތިކް އޭނާގެ ކޮލެޖް ރަހުމަތްތެރިންނާއެކު ނަށައި، މަޖާނަގައި ސަކަރާތްޖަހާ މަންޒަރު ފެނިގެންދެ އެވެ.

ކާތިކް އިތުރަށް ބުނީ އެ ކާމިޔާބީ ހާސިލް ކުރަން އޭނާއަށް 10 އަހަރު ހޭދަވި ކަމަށާއި އެންމެ ފަހުން މަންޒިލާ ހަމައަށް އާދެވިފައިވާ ކަމަށެވެ.

2011 ވަނަ އަހަރު ކާތިކްއަށް އޭނާގެ އެންމެ ފުރަތަމަ ފިލްމު "ޕްޔާރުކާ ޕަންޗްނާމާ"ގެ ފުރުސަތު ލިބުނުއިރު އޭނާ ދިޔައީ އިންޖީނިއަރިންގެ ދާއިރާއިން މަތީ ތައުލީމު ހާސިލް ކުރަމުންނެވެ.

ފިލްމީ މަސައްކަތްތަކަށް ބަލާއިރު ކާތިކް އެންމެ ފަހުން ފެނިގެން ގޮސްފައިވަނީ "ޗަންދޫ ޗެމްޕިއަން"އާއި "ބޫލް ބުލައްޔާ 3"އިންނެވެ.