އެމެރިކާގެ ލޮސް އެންޖެލަސްގެ އެކި ސަރަހައްދުތަކުގައި ރޯވެފައިވާ އަލިފާންގަނޑުތައް ނިއްވުމުގެ މަސައްކަތަށް ކެލިފޯނިއާ ސްޓޭޓްގެ ޖަލުތަކުގައި ހުކުމް ތަންފީޒު ކުރަމުން އަންނަ ގައިދީން ނެރެފި އެވެ.

ހަބަރުތައް ބުނާ ގޮތުގައި އަލިފާންގަނޑު އިތުރަށް ފެތުރެމުން ދާތީ އެ އަލިފާންގަނޑު ނިއްވުމުގައި ހަރަކާތްތެރި ވުމަށް އިތުރު މީހުން ބޭނުންވުމުން ގައިދީން ނެރެން އިދާރާތަކުން ނިންމީ އެވެ. އެގޮތުން އެ ސަރަހައްދުގެ ހުރިހާ ޖަލުތަކުން ޖުމްލަ 400 އަށް ވުރެ ގިނަ ގައިދީން އެ މަސައްކަތަށް ނެރެފައިވާ ކަމަށް ރިޕޯޓުތައް ބުނެ އެވެ.

އެ މަސައްކަތަށް ނެރުނު ގައިދީން ތެރޭގައި ސީރިއަސް ކުށްތައް ކޮށްފައިވާ ގައިދީންނެއް ނުހިމެނެ އެވެ. މަސައްކަތުގައި އުޅޭ ގައިދީން ބުނާ ގޮތުގައި އެފަދަ ނުރައްކާތެރި ކަމެއްގައި ހަރަކާތްތެރި ވުމަކީ ވެސް ޖަލުގެ ދިރިއުޅުމަށް ވުރެ ރަނގަޅު ކަމެކެވެ.

އަލިފާން ނިއްވުމުގެ މަސައްކަތުގައި ގައިދީންގެ އިތުރުން ސަލާމަތީ ބާރުތަކުގެ މީހުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކުން ވެސް އަންނަނީ މަސައްކަތް ކުރަމުންނެވެ.

ލޮސް އެންޖެލަސްގެ ފަސް ސަރަހައްދެއްގައި ރޯވެފައިވާއިރު މިހާތަނަށް 10،000 އިމާރާތް ބިމާ ހަމަވެ، 37000 ހެކްޓަރުގެ ބިން ވަނީ އަނދާ އަޅިއަށްވެފަ އެވެ.