މުދަލު ޒަކާތުގެ ގޮތުގައި މިދިޔަ އަހަރު 100 މިލިއަނަށް ވުރެ ގިނަ ރުފިޔާ ލިބިއްޖެ އެވެ.

މީރާގެ ތަފާސްހިސާބުތަކުން ދައްކާގޮތުން މިދިޔަ އަހަރު މުދަލު ޒަކާތުގެ ގޮތުގައި ޖުމްލަ 101.9 މިލިއަން ރުފިޔާ ވަނީ ލިބިފަ އެވެ.

މިދިޔަ އަހަރު މުދަލު ޒަކާތުގެ ގޮތުގައި ޖުމްލަ 101.9 މިލިއަން ރުފިޔާ ލިބުނުއިރު، އެކަމާ ގުޅިގެން އިސްލާމިކް މިނިސްޓްރީން ބުނީ އެއީ ރެކޯޑު އަދަދެއް ކަމަށެވެ.

މިނިސްޓްރީން ވަނީ ޒަކާތަށް ގިނަ އަދަދެއްގެ ފައިސާ ލިބުމަކީ މުއްސަނދިން މުދަލު ޒަކާތަށް އަހައްމިއްޔަތުކަން ދޭ މިންވަރު ހާމަކޮށްދޭކަމެއްކަން ފާހަގަކޮށްފަ އެވެ. އަދި މިނިސްޓްރީން ވަނީ އެ ފަރާތްތަކަށް ޝުކުރުވެސް އަދާކޮށްފަ އެވެ.

އިސްލާމިކް މިނިސްޓްރީން ބުނީ ޒަކާތުގެ ގޮތުގައި ލިބޭ ފައިސާ އަަބަދުވެސް ހަރަދު ކުރަމުންދާނީ ޝަރުއީ އުސޫލުތަކާއި މިންގަނޑުތަކުގައި ކަނޑައަޅާފައިވާ ގޮތުގެ މަތީން އޭގެ ހައްގުވެރިންގެ މައްޗަށް ކަަމަށެވެ.

ޒަކާތުގެ ކަންކަން ހަރުދަނާކުރުމަށް މިދިޔަ އަހަރު ޖެނުއަރީ މަހު ޒަކާތު ހައުސްގެ ނަމުގައި ހާއްސަ އިދާރާއެއްް އުފައްދައި ޒަކާތާއި ގުޅުން ހުރި ކަންކަމަށް ހޭލުންތެރިކަން އިތުރުކުރުމަށް ގިނަ މަސައްކަތްތަކެއް ވެސް އޮތީ ކޮށްފަ އެވެ.