މާލޭ ގެއެއްގެ ބެލްކަނިން ބިއްލޫރިގަނޑެއް ވެއްޓި މިއަދު ފުލުހަކު ޒަހަމްވެއްޖެ އެވެ.

މީޑިއާތަކަށް ފޮނުވި މެސެޖެއްގައި ފުލުހުން ބުނީ މި ހާދިސާ ހިނގީ މެންދުރު 03:30 ކަންކާއިރު ކަމަށެވެ. އަދި އަމީނީ މަގުގައި ހުރި ގެއެއްގެ ބެލްކަނިން ބިއްލޫރިގަނޑެއް ވެއްޓުނު ހާދިސާއެއް ރިޕޯޓްކޮށްފައިވާ ކަމަށް ފުލުހުން ބުނެ އެވެ.

ފުލުހުން ބުނީ ބިއްލޫރިގަނޑު ވެއްޓި އަނިޔާވީ ފިރިހެން ފުލުސް އޮފިސަރަކަށް ކަމަށެވެ. އެ އޮފިސަރަށް އައިޖީއެމްއެޗުގައި ފަރުވާދެމުންދާ ކަމަށް ވެސް ފުލުހުން ބުންޏެވެ.

އޭނާ އަށް ލިބުނު ގެއްލުންތަކުގެ ތަފްސީލެއް ފުލުހުން ނުދެ އެވެ.

މީގެ ކުރިން ވެސް އިމާރާތްތަކުގެ މަތިން އެއްޗެހި ވެއްޓި މީހުންގެ ފުރާނައަށް ނުރައްކާވެފައި އެބަހުއްޓެވެ.