އާއްމު ތަންތަނުގައި މީޑިއާގެ އުނދަގޫ ހިސާބަށްވުރެ ބޮޑުވުމުން ބޮލީވުޑްގެ މަޝްހޫރު ތަރިއެއް ކަމަށްވާ ސޮނާކްޝީ ސިންހާ ރުޅިގަދަ ވެއްޖެ އެވެ.

ސޮނާކްޝީއަކީ އާއްމު ގޮތެއްގައި މީޑިއާއާ ވަރަށް ރައްޓެހި ތަރިއެއްގެ ގޮތުގައި ބެލެވޭ ތަރި އެކެވެ. އެހެން ނަމަވެސް ދާދި ފަހުން މިވަނީ އޭނާގެ ފަރާތުން މުޅިން އާ ކަމެއް ފެނިފަ އެވެ.

މި ފަހުން މުމްބާއީގައި އޮތް އިވެންޓެއްގައި ފޮޓޯގްރާފަރުންނާއި ކެމެރާމަނުން ވަނީ ސޮނާކްޝީގެ ފޮޓޯ ނެގުމަށްޓަކައި އޭނާ ވަށާލައި ކުރިއަށް ހިނގަން އޮތް މަގު ވެސް ބަންދު ކޮށްފަ އެވެ.

މިކަމާ ހިތްހަމަ ނުޖެހިގެން ސޮނާކްޝީ ވަނީ އެކަން ހުއްޓާލުމަށާއި މިނިވަންކަމާއެކު ހިނގާބިނގާވެ އުޅުމަށް ޖާގަ ދޭން އެއްވެ ތިބި ކެމެރާމެނުންގެ ކިބައިން އެދިފަ އެވެ.

މި މަންޒަރު ފެންނަ ވީޑިއޯއެއް ސޯޝަލް މީޑިއާގައި މިހާރު ދައުރުވަމުން އަންނައިރު އެ ވީޑިއޯއިން ފެންނަ ގޮތުގައި ސޮނާކްޝީ ހިތްހަމަ ނުޖެހިގެން އެއްޗެކޭ ބުނީ ކެމެރާމަނުން އޭނާގެ ފަހަތުން ގިނައިރުތަކެއް ވަންދެން އުޅުނު ފަހުން އުނދަގޫ ވެގެންނެވެ.

ފިލްމީ މަސައްކަތްތަކަށް ބަލާއިރު ސޮނާކްޝީ އެންމެ ފަހުން ފެނިގެން ގޮސްފައިވަނީ ރިތޭޝް ދޭޝްމުކްއާއި ސާގިބް ސަލީމްއާއެކު މިދިޔަ އަހަރު ނުކުތް "ކަކޫޑާ"އިންނެވެ.