އެމެރިކާގެ ލޮސް އެންޖެލަސްގެ އެކި ހިސާބުތަކުގައި ރޯވެފައިވާ އަލިފާންގަނޑުތައް ނިއްވާނުލެވިގެން އުޅެނީ އެ ސިޓީ ހިމެނޭ ކެލިފޯނިއާ ސްޓޭޓްގެ ވެރިންގެ ނާގާބިލް ކަމުން ކަމަށް އެގައުމުގެ އިންތިހާބީ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ވިދާޅުވީ ހަފްތާއަކަށް ވުރެ ގިނަ ދުވަސްވީއިރު ވެސް އަލިފާންގަނޑު ކޮންޓްރޯލް ނުކުރެވިގެން އުޅެނީ ކެލިފޯނިއާ ސްޓޭޓްގެ ވެރިންގެ ސިޔާސަތުތަކުގެ ސަބަބުން ކަމަށެވެ.

"އަލިފާންގަނޑުތައް އަދިވެސް ދަނީ އިތުރަށް ފެތުރެމުން. އެމީހުންނަށް އެއުޅެނީ އެ ނިއްވާނުލެވިގެން. އެއީ ކޮންކަހަލަ ބައެއްތަ؟" ޓްރަމްޕް އޭނާގެ ސޯޝަލް މީޑިއާގައި ލިޔުއްވާފައިވެ އެވެ.

ޓްރަމްޕް ވަނީ މީގެ ކުރިން ވެސް ކެލިފޯނިއާގެ ގަވަރުނަރު ގެވިން ނިއުސަމްއަށް ވަރަށް ބޮޑަށް ފާޑުކިޔާފަ އެވެ. މިއާއެކު ޓްރަމްޕް ވެރިކަމާ ހަވާލުވުމަށްފަހު ވެސް ކެލިފޯނިއާގެ ސްޓޭޓް ސަރުކާރާ ދެމެދު ކޯޅުންތައް އުފެދޭނެ ކަމަށް މީޑިއާތަކުން ބުނެ އެވެ.

ޖެނުއަރީ މަހުގެ ހަތްވަނަ ދުވަހު ލޮސް އެންޖެލަސްގެ ފަސް ސަރަހައްދެއްގައި ރޯވި އަލިފާންގަނޑު މިއަދާ ހަމައަށް ވެސް ކޮންޓްރޯލް ކުރެވިފައިނުވާއިރު އެ ހާދިސާގައި މިހާތަނަށް 24 މީހުން މަރުވެ އެތައް ހާސް ބައެއްގެ ގެދޮރު ވަނީ ގެއްލިފަ އެވެ.

އެ ސަރަހައްދުގެ މޫސުން އިތުރަށް ގޯސްވެ ކުރިއަށް އޮތް ދުވަސްތަކުގައި ވައި ގަދަވާނެ ބެލެވޭތީ އަލިފާންގަނޑުތައް މިހާރަށްވުރެ ވެސް ބޮޑަށް ފެތުރިދާނެ ކަމުގެ ބިރު އޮތީ ހީވެފަ އެވެ.

ލޮސް އެންޖެލަސްއަށް ކުރިމަތިވި މި ހާދިސާއަކީ އެމެރިކާގެ ސިޔާސަތުތަކާއި މިފަދަ ހާދިސާއަކަށް ތައްޔާރުވެފައި އޮތް މިންވަރު އެނގިގެންދާ ކަމެއް ކަމަށް ވެސް ގިނަ ބަޔަކު އަންނަނީ ބުނަމުންނެވެ.

މިމަހުގެ 20 ވަނަ ދުވަހު ރައީސްކަމުގެ ހުވާ ކުރައްވަން ހަމަޖެހިފައިވާ ޓްރަމްޕްއަށް އެންމެ ފުރަތަމަ ވެސް ކުރިމަތިލައްވަން ޖެހޭނީ ކެލިފޯނިއާ އާރާސްތު ކުރުމުގެ ބޮޑު މަސްއޫލިއްޔަތާ އެވެ.