ލޮސް އެންޖެލަސްގައި މިހާރު ރޯވެފައިވާ އަލިފާންގަނޑު ތަކުގައި ގެދޮރު ގެއްލުނު ހޮލީވުޑްގެ އެއް ތަރިއަކީ މަޝްހޫރު ޓީވީ ތަރި އަދި ވިޔަފާރިވެރިޔާ ޕެރިސް ހިލްޓަން އެވެ.

އަލިފާނުގައި ޕެރިސްގެ ގެ ބޭނުން ނުކުރެވޭ ވަރަށް އަނދާ ހުލިވެފައިވީ ނަމަވެސް އޭނާ ވަނީ އެ އަލިފާނުގައި ހާލުގައި ޖެހުނު އެހެން މީހުންނަށް އެހީވާން ފަށައިފަ އެވެ.

އެގޮތުން އޭނާ އަމިއްލައަށް އިސްނަގައިގެން އޭނާ ހިންގާ ހިލޭ ސާބަހަށް މަސައްކަތްކުރާ ޖަމިއްޔާއާ ގުޅިގެން އަލިފާނުގައި ހާލުގައި ޖެހުނު އާއިލާތަކަށް ޖުމްލަ 800،000 ޑޮލަރު ހޯދައިދީފައިވެ އެވެ.

އެއާއެކު ހާލުގައި ޖެހުނު ފަރާތްތަކަށް ފައިސާ ހޯދުމުގެ ގޮތުން ހިންގާ "ގޯފަންޑްމީ"އަށް ވެސް ޕެރިސްގެ ފަރާތުން އިތުރު 150،000 ޑޮލަރު ވަނީ ހަދިޔާ ކޮށްފަ އެވެ.

"މަންމައެއްގެ ގޮތުގައި އަހަންނަށް އިހުސާސް ނުކުރެވޭ ދަރިންނަށް ރައްކާތެރި ބޯހިޔާވަހިކަމެއް ނުދެވުމުން މައިންނަށް ކުރެވޭނެ އިހުސާސް." ޕެރިސް ބުންޏެވެ.

ޕެރިސް ހަދިޔާކުރި މި ފައިސާ ބޭނުން ކުރެވޭނީ އަލިފާނުގައި ގެދޮރު ގެއްލުނު އާއިލާތަކަށް ބޯހިޔާވަހިކަން ފޯރުކޮށްދޭން ކަމަށް ހަބަރުތައް ބުނެ އެވެ.

އަމިއްލަ މީހާއަށް ބޮޑު ގެއްލުމެއް ލިބިފައިވާ ދަނޑިވަޅެއްގައި ވެސް ޕެރިސްގެ ފަރާތުން ފެނުނު ދީލަތިކަން ފާހަގަކޮށް ގިނަ ބަޔަކު އަންނަނީ އޭނާއަށް ތައުރީފް ކުރަމުންނެވެ.